Qlobal Biznes Forumunda Azərbaycanda gənc sahibkarlıq barədə məlumat verilib
Bakı, 20 iyul, AZƏRTAC
“Qlobal Biznes Həftəsi 2023” çərçivəsində Şotlandiyanın Qlazqo şəhərində “Big Boss” Qlobal Biznes və İnnovasiya Forumu keçirilib.
Tədbirdə Kiçik və Orta Biznesin İnkişafı Agentliyinin (KOBİA) İdarə Heyətinin sədri Orxan Məmmədov ölkəmizdə gənc sahibkarlıq, gənclərin biznes fəaliyyətinin dəstəklənməsi üçün mexanizmlər və Agentliyin fəaliyyəti barədə məlumat verib.
Bu barədə KOBİA-dan AZƏRTAC-a bildirilib.
Qeyd edilib ki, KOB-ların iqtisadiyyatda, məşğulluqda və ixracda payını artırmaq KOBİA-nın başlıca hədəfləri sırasındadır. Bu məqsədlərə çatmaqda gənc sahibkarların da rolu var. Azərbaycanda iqtisadi fəal əhalinin təxminən 27 faizini gənclər təşkil edir və onlar biznes fəaliyyətinə də maraq göstərirlər. Aparılan sorğular və araşdırmalar göstərir ki, gənc sahibkarlar daha çox biznes bacarıqlarının olmaması, maliyyə resurslarına və bazarlara çıxışla bağlı problemlərlə üzləşirlər. KOBİA qeyd olunan istiqamətlərdə gənc sahibkarlara müxtəlif mexanizmlər çərçivəsində dəstək göstərir. Azərbaycanın işğaldan azad edilmiş əraziləri yaxın dövrlərdə biznesin, xüsusən də gənc sahibkarlığın inkişafı üçün daha bir mühüm hərəkətverici qüvvə olacaq. Qarabağ regionu üçün nəzərdə tutulan “yaşıl iqtisadiyyat” və “ağıllı şəhər” konsepsiyaları bölgəni yeni innovativ bizneslər üçün cəlbedici mərkəzə çevirəcək.
Bölmənin digər xəbərləri
