Qubaya son 9 ayda gəlmiş 40 min turistdən 6 mini əcnəbi vətəndaş olmuşdur
Quba, 27 sentyabr (AZƏRTAC). Qubaya gələn yerli və əcnəbi turistlərin sayı artmışdır. 2013-cü ilin doqquz ayında rayona 40 minə yaxın turist gəlmişdir ki, bu da ötən ilin müvafiq dövrü ilə müqayisədə 15-20 faiz çoxdur.
Rayon turizm şöbəsinin müdiri Elxan Məhərrəmov AZƏRTAC-a bildirmişdir ki, rayona gəlmiş turistlərin 6 minini əcnəbi qonaqlar təşkil etmişdir. Turistlər Quba-İspik-Xınalıq və Quba-Afurca-Qonaqkənd marşrutları üzrə daha çox səyahət etmişlər. Həmin ərazilərdəki təbiət mənzərələri ilə yanaşı, tarixi yerləri də turistlər maraqla qarşılamışlar.
Diqqətə çatdırmışdır ki, yay mövsümündə Qubada yerləşən turizm obyektlərində yoxlamalar təşkil edilmiş, xidməti heyətdə qeydə alınmış nöqsanlar barədə sahibkarlara xəbərdarlıq edilmişdir.
Qubaya qış fəslində də çoxlu sayda turistin gəlməsini nəzərə alaraq buradakı turizm obyektlərində mövsümə hazırlıq aparılır. İstirahət mərkəzlərində istilik sistemləri yenilənir, ərzaq tədarükü görülür.
Bölmənin digər xəbərləri
