Ramiz Hüseynov: Dünya ictimaiyyəti artıq birmənalı şəkildə Qarabağı Azərbaycanın ayrılmaz hissəsi kimi tanıyır
Sumqayıt, 4 iyul, Ətrabə Rzayeva, AZƏRTAC
Qədim tarixə, zəngin ənənələrə malik Azərbaycan xalqı bu il böyük fərəh və qürur hissi ilə Ulu Öndər Heydər Əliyevin anadan olmasının 100 illik yubileyini qeyd edir. Ulu Öndər öz gərgin və yorulmaz fəaliyyəti sayəsində dövlətçiliyimiz üçün çox möhkəm, həm də eyni zamanda sağlam təməllər formalaşdırdı. Ümummilli Liderin fəaliyyəti həm çoxşaxəli olub, həm də burada ölkəmizin gələcək inkişaf kursu böyük uzaqgörənliklə nəzərə alınıb.
Bu fikri AZƏRTAC-a YAP İdarə Heyətinin üzvü, Sumqayıt şəhər təşkilatının sədri Ramiz Hüseynov deyib.
“Ulu Öndər Heydər Əliyev çox gözəl bilirdi ki, hər bir dövlətin müstəqil yaşamasının ən vacib şərti onun özünümüdafiə qabiliyyətinin yüksək olması və güclü orduya sahiblənməsidir. Bu məqamı Ulu Öndər öz çıxışlarında da hər zaman xüsusi olaraq vurğulayırdı. Bütün digər sahələrdə olduğu kimi, ordu quruculuğu sahəsində də Ulu Öndərin ənənələri Müzəffər Ali Baş Komandan İlham Əliyev tərəfindən çox uğurla davam etdirilir”, - deyə R.Hüseynov bildirib.
O qeyd edib ki, son illər ərzində Azərbaycan Ordusu dayanmadan inkişaf edir və ordumuzun döyüş qabiliyyəti, maddi-texniki təminatı yüksək səviyyəyə qaldırılıb. Azərbaycan dünyanın bir sıra aparıcı dövlətləri ilə hərbi-texniki əməkdaşlığını genişləndirir ki, bu da həm təchizat, həm də döyüş bacarığının artırılması baxımından silahlı qüvvələrimizin inkişafına öz müsbət təsirlərini göstərir. Ölkəmiz öz müdafiə imkanlarını genişləndirməklə yanaşı, danışıqlar prosesində hər zaman sülh istəklərini ortaya qoyur və Cənubi Qafqazda qalıcı sülhə nail olunması baxımından yorulmadan fəaliyyət göstərir. Təəssüflər olsun ki, bu sülh çağırışlarını Ermənistan cavabsız qoyur. Bu gün Ermənistanla aparılan sülh danışıqlarının yekunlaşması bizdən daha çox Ermənistana lazımdır.
Ramiz Hüseynov vurğulayıb ki, xarici qüvvələrin əlində oyuncağa çevrilmiş Ermənistan sülhdən yayınmağa çalışmaqla, əslində, öz sonunu yaxınlaşdırır. Sülh anlaşması beynəlxalq hüququn norma və prinsipləri əsasında, ədalətli şərtlərlə imzalanmalıdır və burada postmüharibə reallıqları mütləq şəkildə nəzərə alınmalıdır. Çünki Azərbaycan 44 günlük Vətən müharibəsində qalib tərəfdir. Bu qalibiyyət isə qəhrəman Azərbaycan oğullarının canı və qanı bahasına əldə edilib. Ermənistan ən son reallıqları dərk edərək düzgün nəticələr çıxarmalıdır. Bu gün güc ölkəmizin tərəfindədir, zaman da bizim mövqeyimizi gücləndirir. Dünya ictimaiyyəti artıq birmənalı şəkildə Qarabağı Azərbaycanın ayrılmaz hissəsi kimi tanıyır. 30 illik işğala, bədnam qonşularımız tərəfindən törədilmiş hərbi cinayətlərə baxmayaraq Azərbaycan hələ də təmkinlə, səbirlə davranır və Ermənistanın sülh təkliflərimizi qəbul edəcəyini gözləyir.
O deyib: “Müzəffər Ali Baş Komandan İlham Əliyev iyunun 23-də Müdafiə Nazirliyinin komando hərbi hissəsinə Döyüş bayrağını təqdim edərkən Ermənistana və onun havadarlarına çox önəmli mesajlar ünvanladı. Qalır onların Prezident İlham Əliyevin səsləndirdiyi mesajlardan doğru nəticələr çıxarmağı”.
Bölmənin digər xəbərləri
