Rektor: Təhsil proqramlarının və kurikulumların yenidən formalaşdırılması əsas prioritetlərdən biridir
Bakı, 20 may, AZƏRTAC
Azərbaycan Dövlət Neft və Sənaye Universiteti mühəndislik və texniki elmlər sahəsində 100 ildən artıq tarixə malik ali təhsil müəssisəsidir. Buna görə də qlobal çağırışları nəzərə alaraq təhsil proqramlarının və kurikulumların yenidən formalaşdırılması universitetin əsas prioritetlərindən biridir.
AZƏRTAC xəbər verir ki, bu fikirləri Azərbaycan Dövlət Neft və Sənaye Universitetinin rektoru Rüfət Əzizov BMT-nin Ümumdünya Şəhərsalma Forumunun 13-cü Sessiyası (WUF13) çərçivəsində keçirilən “Su ilə Ağıllı Şəhərlər: Potensialın İnkişafı Vasitəsilə Şəhər Davamlılığının Gücləndirilməsi” adlı tədbirdə çıxışı zamanı söyləyib.
Rüfət Əzizov qeyd edib ki, son iki ildə Fransanın Strasburq Universiteti ilə birgə su ehtiyatlarının idarə olunması üzrə ikili magistr proqramına start verilib. Proqram çərçivəsində yerli tərəfdaş qismində Azərbaycan Dövlət Su Ehtiyatları Agentliyi də iştirak edir. Agentlik tələbələrə təqaüdlər təqdim edir, eyni zamanda, ölkə üçün prioritet hesab olunan su idarəetməsi mövzularının müəyyənləşdirilməsində dəstək göstərir.
Onun sözlərinə görə, su idarəetməsi Azərbaycan Dövlət Neft və Sənaye Universitetində dayanıqlı inkişaf gündəliyinin mühüm istiqamətlərindən biridir. Bu baxımdan Böyük Britaniyanın Uorvik Universiteti ilə birgə həyata keçirilən bərpaolunan enerji resursları üzrə ikili magistr proqramı da xüsusi əhəmiyyət daşıyır. Həmin proqramı bitirən tələbələr üç universitetin diplomunu əldə edirlər.
“Bu il proqramı ilk məzunlar bitirdi. Proqram mühəndislik, texnologiya, sosial-iqtisadi biliklər və bərpaolunan enerji sistemlərinin proqnozlaşdırılması modellərini birləşdirir. Burada özəl sektor tərəfdaşı kimi bp şirkəti də iştirak edir. Bu, özəl sektor, universitetlər və beynəlxalq tərəfdaşlar arasında əməkdaşlığın uğurlu nümunələrindən biridir”, – deyə Rüfət Əzizov əlavə edib.
Bölmənin digər xəbərləri
