Şaban Məmmədov: Dünyanı qara və ağ görsəm də, musiqi dünyam rəngarəngdir
Tbilisi, 20 fevral, AZƏRTAC
Mən dünyanın rənglərini görmürəm. Dünya mənim üçün qara və ağ rənglərdən ibarətdir. Mən notların necə yazıldığını, musiqi alətlərinin necə olduğunu da bilmirəm. Amma mənim musiqi dünyam rəngarəngdir. Ona görə ki, mən musiqini qəlbimlə duyuram və daxilimdən gələn duyğu ilə oxuyuram. Çalışıram mahnıları elə ifa edim, elə oxuyum ki, təkcə səsimi eşitməsinlər, içimdən gələn sevgini, sevinci duysunlar.
Bu sözlər Marneulidən olan, gözdən əlil gənc müğənni, 25 yaşını qeyd edən Şaban Məmmədova məxsusdur.
Gürcüstan Azərbaycanlıları Konqresində onun ilk yubileyi qeyd olunub. Konqresin sədri Hüseyin Yusifov və musiqisevərlər onu bu münasibətlə təbrik edib, uğurlar arzulayıblar.
AZƏRTAC-ın Gürcüstan üzrə xüsusi müxbiri Şaban Məmmədovun həyat və yaradıcılığı ilə maraqlanıb.
Atası Faril Məmmədov deyir ki, Şaban Məmmədov hələ körpə ikən həkimlərin səhvi, məsuliyyətsizliyi üzündən görmə qabiliyyətini itirib.
Lakin ailə körpə Şabana daim diqqət göstərib, qayğısını çəkib. Sanki ailə Şaban görmə qabiliyyətini itirsə də, onun gələcəyinə inanırmış. Atası deyir: “Biz onun üçün səsli oyuncaqlar alırdıq. Şaban həmin səslərlə əlindəkinin hansı oyuncaq olduğunu və necə səs çıxardığını bilirdi, ona uyğun müxtəlif hərəkətlər edir, səslər çıxarırdı. Beləcə biz onun musiqiyə həvəsinin artdığını gördük. Sonra onun 4-5 yaşı olanda evə balaca elektron pianino aldıq. Səsləndirdiyi ilk musiqi isə “Cücələrim” oldu”.
Valideynləri onu təhsil almaq üçün “Candar” məktəbinə qoyurlar. Çox keçmədən məktəb direktoru onu Tbilisidəki gözdən əlil və zəif görənlər üçün dövlət məktəbinə aparmağı tövsiyə edir. Şaban orada təhsil alır və gürcü dilini öyrənir.
Şaban Məmmədov deyir: “Musiqi mənim həyatıma çox tez daxil oldu. Hələ 7 aylıq körpə uşaq olarkən həkimlərin səhlənkarlığı ucbatından məndə sepsis yaranıb. İlk əməliyyatımı edəndə 9 aylıq körpə olmuşam və görmə qabiliyyətimi də o zaman itirmişəm. Bundan sonra dünyanı səs vasitəsilə dərk etməyə çalışdım. Mənim üçün hər şey musiqi idi. İnsanların danışığını, quşların cingiltili səsini, yarpaqların xışıltısını, küləyin, yağışın səsini, hər şeyi ürəyimlə dinləyib müşahidə edirdim, hər səsdə melodiya axtarırdım”.
Şaban həftənin beş gününü pansionat tipli məktəbdə musiqi məktəbində qalır. Orada “Brayl əlifbası” ilə musiqini daha dərindən öyrənməyə başlayır. Beləcə onun istedadı inkişaf edir.
Sonradan Marneulidə Mədəniyyət Evinə gələn Şaban burada musiqi qabiliyyətini daha da inkişaf etdirib. O, indi Azərbaycan, gürcü və digər xalqların bəstəkar və xalq mahnılarını məharətlə ifa edir.
Bu gün Şaban azərbaycanlıların təşkil etdikləri el şənliklərində, milli bayramlarda ifa etdiyi “Azərbaycan”, “Küçələrə su səpmişəm”, “Sarı gəlin”, “Ay Laçın”, “Ey əziz anam Azərbaycan”, “Şirin yuxun olaydım”, “Qal sənə qurban”, “Gəl ey səhər” mahnıları ilə hamını heyran edir. Dəfələrlə Marneulidə və Tbilisidə, eləcə də digər bölgələrdə keçirilən el şənliklərində oxuyan Şaban artıq müğənni kimi şöhrət qazanıb.
Onun geniş arenadakı ilk uğurlu çıxışı Gürcüstanda hər il keçirilən “Xalxuri” (Xalq mahnıları) festivalında olub. Şaban Məmmədovun gürcü dilində ifa etdiyi "Gecikmişdilər" mahnısı tamaşaçılar tərəfindən böyük alqışlarla qarşılanıb. Hətta “Gənc azərbaycanlı musiqiçinin gürcü dilində mahnısı gürcüləri ağlatdı” sərlövhəli məqalə də dərc olunub.
Ş.Məmmədov deyir: “Mən ifamın belə qarşılanacağını gözləmirdim. Mahnının belə uğur qazanmasında “Şəvnəbada” ansamblının böyük rolu oldu”.
Gənc müğənninin uğurları bununla bitmir. Şaban Batumi Beynəlxalq Festivalının ən yüksək mükafatı olan Qran-Pri mükafatını qazanıb. Gənc ifaçı Çexiyanın Praqa şəhərində keçirilən “Praqa Milad Ulduzları 2023” 39-cu Beynəlxalq xalq rəqsləri və musiqisi müsabiqə-festivalında Qran-Pri mükafatına, “Qızıl mikrofon” və digər mükafatlara layiq görülüb. Onun Parisdə, Ukraynada, Slovakiyada da uğurlu çıxışları olub. Ən yaddaqalan çıxışlardan biri də Şuşadakı çıxışı olub.
Ş.Məmmədov milli geyimləri çox sevir. Gürcü ədəbiyyatını və tarixini də yaxşı bilir. “Brayl əlifbası” ilə mətnləri oxuyur, audiokitablara qulaq asır.
O, “Dünyanı necə təsəvvür edirsən?” sualına da özünəməxsus şəkildə cavab verib: “Mən dünyanı qara və ağ rəngdə görürəm. Mahnının rənginə gəldikdə isə onu deyə bilərəm ki, bəli, mahnı dünyam rəngarəngdir”.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
