Sahib Alıyev: Ermənistanın növbəti dəfə belə rəzil duruma düşməsi diplomatiyamızın uğurudur
Bakı, 17 avqust, AZƏRTAC
BMT Təhlükəsizlik Şurasında Qarabağla bağlı dinləmə mənə ötən əsrin 90-cı illərinin əvvəlində, hələ SSRİ-nin dağılmadığı dönəmdəki vəziyyəti xatırlatdı. Daha dəqiq desək, ABŞ və Rusiya təmsilçilərinin çıxışları belə təəssürat yaradırdı. Rusiya təmsilçisinin Qarabağın, daha dəqiq, haylar yaşayan hissəsini məhz Ermənistan rəhbərliyinin son zamanlar aparılan danışıqlardan sonrakı açıqlamalarına istinad edərək, Azərbaycan torpağı olaraq tanıdıqlarını dilə gətirməsi, təbii ki, düşündürücüdür. Beynəlxalq normaların rəsmi Moskva üçün heç bir anlam daşımadığı aydındır, sadəcə o aydın deyil ki, Paşinyanın Qarabağın Azərbaycan torpağı olduğunu deməsinə oradakılar sevinir, yoxsa kədərlənir. Bütün hallarda Kremldəkilərin hərəkətləri Qorbaçovun ozamankı vurnuxmalarına bənzəyir. Amma bu vurnuxma onlara yenə də baha başa gələ bilər. Çünki ötən əsrin sonlarında Qarabağ uğrunda Azərbaycanla Ermənistan arasındakı qarşıdurmadan SSRİ-nin dağılması üçün necə faydalanmışdılarsa, ABŞ-ın indi də ondan Rusiyanı regiondan vurub çıxarmaq məqsədilə istifadə etməyə çalışdığı açıq-aydın görünür. Dünənki dinləmədə belə bu, hiss olunurdu.
Bu sözləri AZƏRTAC-a açıqlamasında Milli Məclisin deputatı Sahib Alıyev səsləndirib.
Deputatın sözlərinə görə, detallara varmadan qeyd etmək lazımdır ki, ABŞ-ın təmsilçisi bir sıra hallarda özünü BMT Təhlükəsizlik Şurasının kürsüsündən yox, Kaliforniyada seçkiqabağı kampaniyada çıxış edirmiş kimi aparırdı. Belə görünür ki, Qarabağın Azərbaycan torpağı olduğunu, bunu görməzdən gələnlərə anlatmaq üçün çox qısa zamanda daha təsirli addımlar atmaq lazım gələcək. ABŞ təmsilçisinin Azərbaycanla Ermənistana Qarabağla bağlı "uzunmüddətli danışıqlar" (uzunmüddətli, yəni nə qədər, yenə 30 il ? ) təklif etməsi isə bəziləri kimi Vaşinqtonun da regionda sülhdən daha çox qarşıdurmanın qalmasında maraqlı olduğunu göstərməkdən başqa heç bir anlam daşımır.
“Beləliklə, dünənki dinləmə bəzi böyük və Fransa kimi içindən böyüklük keçən, yaxud da özünü belə görən dövlətlərin Qarabağa yanaşmalarının elə də dəyişmədiyini, oradakı etnik azlıqdan geosiyasi məqsədləri üçün faydalanmağa çalışdıqlarını bütün çılpaqlığı ilə üzə çıxardı. Bununla yanaşı elələrinin alətinə çevrilənlərin gözləntiləri özünü doğrultmadı. Guya hayların hallarına acıdıqlarını deyənlər oldu, amma onlar arzuladıqları və vəd olunan qətnaməni əldə edə bilmədilər. Niyə? Ona görə ki, qarşılarındakı ötən əsrin sonlarındakı Azərbaycan deyil.
Ermənistanın növbəti dəfə belə rəzil duruma düşməsi məncə, təkcə diplomatiyamızın uğuru sayılmamalıdır, bu, bütövlükdə, Azərbaycan dövlətinin adına yazılmalıdır”, - deyə S.Alıyev vurğulayıb.
Deputat bildirib ki, dinləmə qabağı güc strukturlarımızın Qarabağdakı terrorçu qruplaşmalarla bağlı ortaya qoyduqları faktlar, ələ keçirilən hay diversantı, şərti sərhəddə və Rusiya hərbi kontingentinin müvəqqəti yerləşdiyi torpaqlarımızda baş verənlər unudulmamalıdır.
“Sonda BMT TŞ-da bizi müzakirə edənlərin, o cümlədən hayların diqqətini Azərbaycan Xarici İşlər Nazirliyinin dünənki toplantının yekunları ilə bağlı bəyanatına yönəltmək istəyirəm. Azərbaycan XİN-in bəyanatındakı "suverenliyimizi və ərazi bütövlüyümüzü BMT Nizamnaməsində və beynəlxalq hüquqda təsbit edilmiş bütün qanuni vasitələrlə qorumaqda əzimliyik" cümləsi bizi şikayət və müzakirə edənlərə tutarlı cavabdır. Anlamayanların, ilk növbədə də, düşmənlərimizin bunun nə demək olduğunu bilmələri üçün fikrimcə, elə də çox gözləmək lazım gəlməyəcək”.
Bölmənin digər xəbərləri
