SAHİBKARLIĞA KÖMƏK MİLLİ FONDUNUN VƏSAİTİ HESABINA İLK KREDİTLƏR AYRILIR
“Azərbaycan Respublikasının Sahibkarlığa Kömək Milli Fondunun Əsasnaməsinin təsdiq edilməsi haqqında” Azərbaycan Prezidentinin 2002-ci il 27 avqust tarixli Fərmanına əsasən, digər maliyyə təsisatları ilə birlikdə kredit xətti üzrə Sahibkarlığa Kömək Milli Fondu ilə müqavilə imzalamış “Turanbank” və “Texnikabank” müvəkkil bankları 160 -a yaxın sahibkarın biznes-planlarını müzakirə edirlər.
“Turanbank” -ın idarə heyətinin sədri Nazim Sadıqovun bildirdiyinə görə, ekspertlər turist firmalarından birinin biznes-planını bəyənmişlər və həmin firmaya vəsait ayrılması barədə qərar qəbul edilmişdir. Fondun vəsaitlərindən istifadə qaydalarına uyğun olaraq, müvəkkil banklar vəsaitləri öz adlarından və öz riskləri hesabına yerləşdirir, biznesmenlərin təqdim etdikləri hər bir sənəd ətraflı nəzərdən keçirirlər.
“Texnikabank”ın kredit departamentinin məlumatına görə, kredit üçün müraciət etmiş sahibkarlardan ancaq 20 hüquqi və fiziki şəxsin biznes-planları tələblərə cavab verir və bunların 11-i kredit komitəsinin birinci iclasının müzakirəsinə verilmişdir. Komitənin qərarı ilə “Göyçay-tikiş” açıq səhmdar cəmiyyəti üçün 60 milyon manat ayrılmış, daha beş müəssisə isə yaxın vaxtlarda kredit alacaqdır.
Bölmənin digər xəbərləri
