SAHİBKARLIĞIN İNKİŞAFINA MANE OLAN HALLARIN ARADAN QALDIRILMASI ÜZRƏ QƏTİ TƏDBİRLƏR GÖRÜLÜR
Azərbaycan Respublikasında möhtərəm Prezidentimiz cənab Heydər Əliyevin rəhbərliyi ilə aparılan iqtisadi islahatlar sahibkarlığın inkişafına təkan vermiş, sahibkarlığın potensialından tam istifadə edilməsi və onun həlledici amilə çevrilməsi, yerli və xarici iş adamlarının fəaliyyətinin səmərəliliyinin artırılması və onların işinə əngəl yaradan halların aradan qaldırımasına xüsusi diqqət yetirilərək, bu sahədə bir çox mühüm qərarlar qəbul edilmişdir.
Əhalinin həyat səviyyəsinin yaxşılaşdırılmasında və iqtisadiyyatın inkişafında sahibkarlığın rolu nəzərə alınaraq ölkəmizin Prezidenti tərəfindən bu ilin aprel-may aylarında yerli və xarici sahibkarlarla görüşlər keçirilmiş, bu sahədə bir sıra problemlərin hələ də mövcud olması aşkar edilmişdir.
Sahibkarlığın inkişafının daha da sürətləndirilməsi və ona mane olan halların aradan qaldırqılması məqsədi ilə Azərbaycan Respublikası Prezidenti tərəfindən “Azərbaycan Respublikasında sahibkarlığın inkişafına dövlət himayəsi sahəsində əlavə tədbirlər haqqında” 2002-ci il 10 sentyabr tarixli, “Sahibkarlığın inkişafına mane olan müdaxilələrin qarşısının alınması haqqında” 2002-ci il 28 sentyabr tarixli Fərmanlar verilmişdir.
Həmin Fərmanlarda bir sıra dövlət orqanları ilə yanaşı, Ədliyyə Nazirliyinə də mühüm göstərişlər verilmiş, o cümlədən sahibkarlıq fəaliyyəti sahəsində dövlət qeydiyyatı ilə bağlı süründürməçilik hallarının aradan qaldırılması, dövlət qeydiyyatı prosedurunun sadələşdirilməsi, sahibkarlıq üçün süni maneələr yaradan normativ xarakterli aktların dövlət qeydiyyatına alınmaması, sahibkarların fəaliyyətinə qanunvericilikdə nəzərdə tutulmayan müdaxilə hallarına yol verən ictimai təşkilatlar barəsində müvafiq tədbirlərin görülməsi tapşırılmışdır.
Azərbaycan Respublikası Prezidentinin qeyd edilən fərmanlarının icrasının operativ təşkili məqsədi ilə bu məsələ təxirəsalınmadan nazirliyin Kollegiya iclasında müzakirə olunmuş, zəruri tədbirlərin görülməsinə dair konkret tapşırıqlar verilmiş, hüquqi şəxslərin dövlət qeydiyyatı orqanlarının fəaliyyətinin yoxlanılaraq ətraflı təhlil edilməsi və digər tədbirlərin həyata keçirilməsi qərara alınmışdır.
Ölkəmizin Prezidentinin Fərmanları ilə sahibkarlığın inkişafı sahəsində ədliyyə orqanları qarşısında qoyulmuş vəzifələrin dönmədən və düzgün icrasının təmin edilməsi, aparılmış təhlil və yoxlama nəticələrinin müzakirəsi və hüquqi şəxslərin dövlət qeydiyyatının sadələşdirilməsi və təkmilləşdirilməsi üzrə tədbirlərin görülməsi məqsədi ilə bu məsələ hüquqi şəxslərin dövlət qeydiyyatını həyata keçirən əməkdaşların, o cümlədən bütün on bölgə şöbələri müdirlərinin iştirakı ilə 2002-ci il 5 noyabr tarixdə Ədliyyə Nazirliyinin geniş Kollegiya iclasında müzakirə olunmuşdur.
Ədliyyə Naziri Fikrət Məmmədovun sədrliyi ilə keçirilən kollegiyada aparılan müzakirələr göstərmişdir ki, hüquqi şəxslərin dövlət qeydiyyatı orqanlarının bir sıra vəzifəli şəxsləri tərəfindən ciddi nöqsan və kobud qanun pozuntularına, o cümlədən vətəndaşların əsassız get-gələ salınması, süründürməçilik və digər mənfi hallara yol verilmiş, bütün bunlar isə haqlı narazılıqlar və sahibkarlıq fəaliyyətinə süni maneələrlə nəticələnmişdir.
Bununla əlaqədar, hüquqi şəxslərin dövlət qeydiyyatı üzrə Bakı bölgə şöbəsinin müdiri və müavini, Xaçmaz və İmişli bölgə şöbələrinin müdirləri tutduqları vəzifələrdən azad edilmiş, digərlərinə sonuncu xəbərdarlıqla şiddətli töhmət verilmiş, onların işdə qalıb-qalmaması məsələsinə fəaliyyətlərində dönüş yaratmalarından asılı olaraq baxılması qərara alınmış, həmçinin bir sıra məsul əməkdaşlar barədə ciddi intizam tədbirləri görülmüşdür.
Eyni zamanda, Kollegiyada hüquqi şəxslərin dövlət qeydiyyatı orqanlarnın fəaliyyətinə təsirli nəzarətin təmin edilməsi, iş üsul və vasitələrinin təkmilləşdirilməsi və qeydiyyat prosesinin sadələşdirilməsi üzrə komleks tədbirlər müəyyən olunmuş, sahibkarlığın inkişafına dövlət himayəsinin daha da artırılması ilə bağlı Azərbaycan Respublikası Prezidentinin fərmanları ilə ədliyyə orqanları qarşısında qoyulmuş digər mühüm vəzifələrlə əlaqədar konkret qərarlar qəbul edilmişdir.
Bölmənin digər xəbərləri
