Şahzadə Diananın paltarı hərracda bir milyon dollardan baha satılıb
Bakı, 19 dekabr, AZƏRTAC
Şahzadə Diananın qara donu Hollivudda yerləşən “Julien's Auctions” satış evində 1 milyon 148 min dollara satılıb. Bu, ilkin qiymətdən təxminən 11 dəfə çoxdur.
AZƏRTAC BBC teleradio kompaniyasına istinadla xəbər verir ki, ulduz naxışlı məxmər paltar mərhum Uels şahzadəsinin indiyə qədər satılan ən bahalı geyimi olub. Şahzadə Diana onu ilk dəfə 1985-ci ildə keçmiş əri Uels şahzadəsi Çarlz (hazırda Böyük Britaniya kralı III Çarlz) ilə gəzinti zamanı Florensiyada şam yeməyi zamanı geyinmişdi.
Geyim əşyası dünyaşöhrətli parça taciri Yakob Şlapfer tərəfindən seçilən parçadan hazırlanıb və “Jacques Azagury” brendinin dizaynerləri tərəfindən metal ulduzlarla bəzədilib. Hərrac təşkilatçıları onu ilkin olaraq 100 min dollar həcmində qiymətləndirmişdi.
Şahzadənin 1981-ci ildə nişan portreti üçün geyindiyi koftası da hərracda öz alıcısını tapıb. O, ekspertlər tərəfindən ilkin olaraq 80 min dollara qiymətləndirilsə də, 381 min dollara satılıb.
Bölmənin digər xəbərləri
