Şalva Papuaşvili: Xarici ölkə səfirləri Gürcüstanın daxili işlərinə qarışmamalıdır
Tbilisi, 4 aprel, AZƏRTAC
Gürcüstanda fəaliyyət göstərən xarici ölkələrin səfirləri “Diplomatik Münasibətlər haqqında Vyana Konvensiyası” çərçivəsindən kənara çıxmamalı və daxili işlərə qarışmamalıdırlar. Diplomatik missiya nümayəndələrinin dövlətin daxili işlərinə müdaxiləsi beynəlxalq hüququn pozulmasıdır.
AZƏRTAC xəbər verir ki, belə bəyanatla Gürcüstan parlamentinin sədri Şalva Papuaşvili çıxış edib. O, Fransa səfirinin son bəyanatlarına cavab olaraq bildirib ki, bu və digər ölkələrin diplomatları Gürcüstanda radikal qüvvələrə dəstək göstərirlər. “Təəssüf hissi ilə qeyd edim ki, diplomatik nümayəndəliklərdən bəziləri beynəlxalq hüquqla müəyyənləşdirilən məhdudiyyətləri nəzərə almır və Gürcüstanın daxili işlərinə qarışır. Onların qeyri-qanuni şərhləri, eləcə də Gürcüstan parlamentinə və ədliyyə sisteminə hücumları qəbuledilməzdir”, - deyə Papuaşvili vurğulayıb.
Papuaşvili xarici ölkələrin səfirliklərini martın 31-də Gürcüstan parlamentinin binasına pirotexniki vasitələrlə olunan hücumu pisləməyə dəvət edib. O xatırladıb ki, radikal müxalifətin hücumu beynəlxalq tərəfdaşlar tərəfindən maliyyələşdirilən qeyri-hökumət təşkilatlarının təşkil etdiyi tədbir zamanı baş verib.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
