Şanxaya xaricdən gələn sərnişinlərdən koronavirus üçün analizlər götürülür
Pekin, 23 mart, AZƏRTAC
Çinin maliyyə mərkəzi olan Şanxaya xaricdən gələn bütün sərnişinlərin yeni növ koronavirus (COVID-19) daşıyıcısı olub-olmadığını müəyyən etmək üçün analizləri (nuklein turşu testi) götürülür.
AZƏRTAC şəhər hökumətinin məlumatına istinadla xəbər verir ki, buna səbəb son günlər xaricdən gələn sərnişinlərdə COVID-19 infeksiyasına yoluxma hallarının çoxalmasıdır. İndiyədək yalnız koronavirusun ən çox yayıldığı 24 ölkədən gələnlərin və son 14 gün ərzində həmin dövlətlərə səyahət edənlərin analizləri götürülürdüsə, martın 23-dən etibarən bütün sərnişinlərin test yoxlanışından keçməsi məcburidir. Bundan başqa, xaricdən gələn sərnişinlərin bədən hərarəti ölçülür və onlardan sağlamlıq vəziyyəti haqqında bəyannaməni doldurmaları tələb olunur.
Qeyd edək ki, indiyədək Şanxaya xaricdən gələn sərnişinlərdən 56 nəfərində COVID-19 infeksiyası aşkarlanıb. Çin hökuməti xaricdən ölkəyə virus axınının qarşısını almaq üçün sərhəd karantini tədbirlərini sərtləşdirib.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
