Bakı, 20 iyun, Laçın Sultanova, AZƏRTAC

Misirin Sinay yarımadasının cənubunda, Qırmızı dənizin sahilində yerləşən Şarm-əş-Şeyx kurortu son vaxtlar azərbaycanlı turistlərin arasında daha çox şöhrət qazanır. Yəqin ki, bu cür yüksəlişin səbəblərindən biri Bakı ilə Şarm-əş-Şeyx arasında müntəzəm təyyarə reysinin açılması ilə bağlıdır. Bu birbaşa reysi Misirin “Air Cairo” aviaşirkəti həyata keçirir. “Silk Way Travel” şirkəti azərbaycanlı jurnalistlər üçün dünya şöhrətli bu gözəl kurort şəhərinə press-tur təşkil edib.

Əvvəlcə şəhərin özü, onun tarixi haqqında bir neçə söz demək istərdik. Hələ Osmanlı imperiyası dövründən məşhur olan Şarm-əş-Şeyx ərəb dilindən tərcümədə “Şah körfəzi” və ya “Şeyxin buxtası” mənasını verir. Şarm-əş-Şeyx Naama-Bey buxtasında yerləşir ki, bu da ərəbcə “Ağsaqqal buxtası” anlamındadır. Unikal coğrafi mövqeyə malik şəhər cənub-qərbdən Ras-Mohammed dəniz milli parkı, şimal-şərqdə Nabk milli qoruğu ilə həmsərhəddir, şəhər şimal-qərbdə möhtəşəm Sinay dağ silsiləsi ilə külək və yağışdan qorunur, şəhərin cənub-şərqini isə Qırmızı dənizin suları yuyur.

Şarm-əş-Şeyxin yerləşdiyi Sinay yarımadası dünyanın iki hissəsini - Afrika və Asiyanı birləşdirir. Yarımada şimaldan Aralıq dənizinin sahili, şərqdən Akaba körfəzi, qərbdən Süveyş kanalı ilə əhatə olunub.

Yarımada praktiki olaraq özünün əzəli görkəmini saxlayıb. Sivilizasiyanın toxunmadığı səhra və dağlar müasir adam üçün sakitlik və təbii harmoniya ilə hopdurulmuş qeyri-adi atmosfer yaradır. Sinayın əsas ərazisi məskunlaşmayıb, bəzən fotoşəkildə Ay səthi mənzərəsini xatırladan səhra və dağlıq ərazilərdə azsaylı bədəvilər yaşayır.

Şəhərdə müxtəlif səviyyədə və qiymətdə 200-dən çox otel fəaliyyət göstərir. Press-turun təşkilatçıları bizim üçün bu otellərdən ən yaxşısını seçmişdi. Bu otellər rahatlığı yüksək səviyyədə təmin edir və Qırmızı dənizin əsrarəngiz gözəlliyini kəşf etmək və beynəlxalq qonaqpərvərliyin cah-cəlalı ilə əhatə olunmaq istəyən ən tələbkar turistləri də razı salmaq iqtidarındadır. Bunlardan biri ən gözəl mərcan qayalarından birində yerləşən Tiran adası ilə üzbəüz olan “Baron Resort Sharm El Sheikh” oteli oldu. Bu, müasir memarlıq üslubunda, qəşəng ağ çimərlik qumu olan dəbdəbəli beşulduzlu oteldir. 100.000 kvadratmetri əhatə edən bu böyük kompleks “Ras Nasrani Bay” mərkəzinin görkəmli yerində yerləşir və üzü Qırmızı dənizə baxır. Burada bizə əla servis və xidmətlər təqdim edildi.

Bütün otellərdə SPA və sağlamlıq mərkəzləri, gözəllik salonları və bərbərxana, pulsuz “Wi-Fi” var, müxtəlif əyləncəli proqramlar, darts, çimərlik voleybolu, çimərlik futbolu, dayvinq, boçça, aerobika, tennis və bilyard kimi idman oyunları keçirilir.

Şarm əş-Şeyxdə birinci gün yaxtada çox romantik gəzinti ilə yadda qaldı. Gəzintinin özündən başqa, proqrama snorklinq (maska və borucuqla üzmə) və nahar daxil idi. Bu cür gəzinti Şarm əş-Şeyxin əsas buxtalarından yan ötməklə sahil boyunca keçir. Bir müddətdən sonra bizə suya enmək, maska və borucuğu taxmaq, üzmək və dənizin dibindən zövq almaq təklif olundu. Hamı gəzinti və unikal təbii mərcan qayaları ilə qarşılaşdığımız suya dalmadan böyük zövq aldı.

Dəniz varlıqlarının növ müxtəlifliyi və Qırmızı dənizin yüzlərlə mərcan qayası Şarm əş-Şeyxi drayvinq və ekoturizm həvəskarları üçün xüsusilə cəlbedici edir. Son onilliklərdə şəhərin turizmə əsaslanan iqtisadiyyatı xeyli inkişaf edib və yüksək səviyyəli kurortların yaranmasına səbəb olub.

Azərbaycan jurnalistlərinin Cənubi Sinay vilayətinin qubernatoru Xalid Fouda ilə ünsiyyətdə olmaq imkanı oldu. X.Fouda bildirdi ki, Cənubi Sinay Azərbaycandan olan turistlərin axınını artırmağı planlaşdırır. Rusiya təyyarəsinin qəzaya uğraması ilə (Rusiya və Britaniya hakimiyyət orqanları öz vətəndaşlarının Misirə səfərini qadağan etmişdi) ötən ilin sonundan etibarən bu kurort şəhərinə gələn turistlərin sayının kəskin azaldığını xatırladaraq, qubernator əyalət hakimiyyətinin ərəb ölkələri, eləcə də Azərbaycan, Gürcüstan və Qazaxıstandan gələn turistlərin sayını artırmaq niyyətini açıqladı.

2015-ci ilin mayında Azərbaycana səfəri haqqında danışan Xalid Foud Prezident İlham Əliyevlə görüşü məmnunluqla xatırlayaraq bildirdi ki, səfər nəticələrini verib, artıq Şarm əş-Şeyx və Bakı arasında müntəzəm aviareys fəaliyyət göstərir ki, bu da turistlərin sayını artırmağa imkan verəcək.

Qubernator deyib: “Daimi aviareyslər bütün sahələrdə, o cümlədən turizm sahəsində Misir və Azərbaycan arasında əlaqələrin inkişafına öz töhfəsini verəcək”.

Qubernatorun sözlərinə görə, Misirin bu turizm regionunda ziyarət və müalicəvi turizm kimi yeni turizm növlərinin inkişafı üçün yeni plan hazırlanıb. O bildirdi ki, adada bu turizm növlərinin inkişafı üçün qədim Müqəddəs Katerina monastırı var, Sinayda 200 müalicəvi ot bitir, 5 müxtəlif qoruq fəaliyyət göstərir.

Vilayətin inkişafına dair yeni plana əsasən, yaxtaların yan alması üçün xüsusi limanlar, Disneylendə oxşar əyləncə, habelə biznes-mərkəzlər tikiləcək.

Şarm əş-Şeyxə səfərimiz Ramazan ayı ilə üst-üstə düşdüyündən gün ərzində şəhər sanki yatırdı, toran düşəndə isə çoxsaylı mağazaları, kazinoları, diskotekaları və gecə klubları ilə Şarm əş-Şeyxdə səs-küylü gecə həyatı başlayırdı.

Bir sözlə, Şarm-əş-Şeyx xoş kurort atmosferi, alış-veriş üçün böyük imkanları ilə seçilən şəhərdir. O, çimərlik istirahəti və suya dalma həvəskarları üçün ideal yerdir. Zəngin faunalı çoxsaylı mərcan qayaları bir çox rəngarəng balıq və digər dəniz varlıqları ilə dayvinq həvəskarları üçün çox maraqlıdır. Misirin bu populyar kurortu artıq bir neçə onillikdir ki, dəniz sahilində rahat və komfort məzuniyyət üçün ideal yer sayılır. “Air Cairo” aviaşirkətinin (Misir) Azərbaycandakı baş tərəfdaşı olan “Silk Way Travel”dən tur-paket və Şarm əş-Şeyxə yollanmaq üçün təyyarə bileti almaq olar. Ətraflı məlumatı http://swtravel.az/ru/sharm-al-sheyh.html  saytında öyrənmək mümkündür.

Səfər proqramımıza təkcə Şarm əş-Şeyxdə istirahət deyil, həm də Misirin qədim və hazırkı paytaxtını ziyarət etmək daxil idi. Qahirə ilə tanışlıq məşhur Təhrir meydanında yerləşən Milli Muzeylə başladı. Muzey bələdçisi bildirdi ki, kolleksiyada qədim Misirin bütün tarixi dövrlərinə aid təxminən 120 min eksponat var və onların hamısı, təkcə biri istisna olmaqla, orijinaldır. Muzeyin binası neoklassik üslubda fransız memar Marsel Dyunonun layihəsinə əsasən 1900-cü ildə inşa edilib. Memarın özü muzeyin həyətində torpağa tapşırılıb. Muzeyin açılışı 1902-ci ildə olub.

Misirə səfər etmək və ehramları görməmək qeyri-mümkündür. Budur, ehramlarla çoxdan gözlənilən görüş. Doğrudur, ehramların yaşayış yerlərinə yaxınlığı təəccüb doğururdu. Mənə elə gəlirdi ki, onlar böyük səhrada yerləşir və müasir dünya ilə əlaqələri yoxdur. Fironların ehramları öz əzəməti ilə addamı heyran qoyur. Bu gözəl abidələrə baxanda elə təəssürat yaranmır ki, zaman onlardan yan keçib.

Gizadakı ehramlar e.ə. XXVII əsrə aid edilən qədim abidələr kompleksidir. Xeops ehramı qədim dünyanın yeddi möcüzəsindən qalan yeganə abidədir. O həmçinin Misirin milli sərvətidir.

Qahirə ziyarətinin daha bir parlaq xatirəsi Nil çayında qayıqla gəzinti oldu. Bu unudulmaz ekskursiya zamanı sahilin hər iki tərəfindəki yaşayış evləri və biznes-mərkəzlərə mənzərə açılır. Qayığın qədim Nil sularında üzməsi insanı vəcdə gətirir, adam özünü başqa bir məkanda hiss edir. Bu gəzinti həm də termometrin müsbət 40 dərəcə göstərdiyi bürkülü havada sərinlikdən həzz almaq imkanı yaratdı.

Yolumuzun üstündəki növbəti məntəqə İsgəndəriyyə idi. Bu əfsanəvi qədim, həm də Misirdə ikinci ən böyük şəhər böyük kitabxanası və yunan-Roma muzeyi ilə məşhurdur. Burada ümumiyyətlə hər yerdə tarixin izləri var. Tarixi şəhərlə tanışlıq Aralıq dənizi sahilində, gözəl və mənzərəli parkda yerləşən Prezident iqamətgahı ilə başladı.

Montaza Sarayının yerləşdiyi 150 hektar sahəsi olan parkda gözəl landşaft dizaynı, nohurlar, köşklər və heykəllər var. İnşası 1926-cı ildə başa çatdırılan İsgəndəriyyədəki Montaza Kral Sarayı türk-Florensiya üslubunda tikilib, onun otaqlarının bəzədilməsi üçün xüsusi olaraq İtaliyadan mərmər gətirilib. Binada 250 müxtəlif otaq var. Böyük saray binasında hazırda ziyarət üçün qapalı olan Misir Prezidentinin iqamətgahı yerləşir.

Jurnalist qrupumuzun tanış olduğu növbəti görməli yer Kayt bəy qalası idi. XV əsrə aid bu istehkam Aralıq dənizi sahilində, dünyanın yeddi möcüzəsindən birinin xarabalıqları üzərində yerləşir. Qalanın təməli 1477-ci ildə məmlük sultanı əl-Əşrəf Saif əl-Din Kayt bəy tərəfindən qoyulub. Hazırda qalada İsgəndəriyyə Dəniz Muzeyi yerləşir.

İsgəndəriyyəyə birgünlük səfərdən sonra yenidən Misirdə doğma məskənimizə çevrilən Şarm əş-Şeyxə qayıtdıq. Birhəftəlik press-turun qalan iki gününü haqlı olaraq Qırmızı dənizin misilsiz xəzinəsi adlandırılan bu gözəl kurort şəhərində keçirdik. Şarm əş-Şeyxi tərk edərkən bura yenidən gəlməyi vəd etdik.

Şarm əş-Şeyxi mütləq ziyarət edin, şəhər xoşunuza gələcək!