“SƏRHƏD” HƏRBİ-İDMAN OYUNUNUN QALİBLƏRİ MÜKAFATLANDIRILMIŞLAR
Dövlət Sərhəd Xidmətinin rəisi general-leytenant Elçin Quliyev, təhsil naziri Misir Mərdanov, gənclər və idman naziri Azad Rəhimov respublikamızın 29 sərhədyanı rayonunun orta məktəblərinin X sinif şagirdləri arasında artıq ikinci ildir ki, keçirilən yarışların əhəmiyyətindən, əldə edilən uğurlardan danışmışlar. Məlumat verilmişdir ki, final mərhələsi səkkiz komandanın iştirakı ilə iyulun 9-dan 16-dək Lənkəran Sərhəd Dəstəsinin Astara sərhəd nəzarəti məntəqəsinin bazasında keçirilmişdir.
İştirakçılar sıra hazırlığı, sərhəd naryadı tərəfindən nəqliyyat vasitələrinə baxışın təşkili, avtomat silahin sökülməsi və yığılması, vətəndaşların şəxsiyyətini təsdiq edən sənədlərdə qüsurların aşkar olunması, ilk tibbi yardımın göstərilməsi və s. üzrə məharətlərini nümayiş etdirmişlər.
Natiqlər ümummilli lider Heydər Əliyevin, ulu öndərin siyasi xəttini əzmlə həyata keçirən Prezident İlham Əliyevin dövlət sərhədlərimizin qorunmasına göstərdikləri böyük diqqət və qayğını, sərhədçilərin iş şəraitinin yaxşılaşdırılmasına yönəldilmiş tədbirləri xatırlatmış, belə yarışların sərhədlərin mühafizəsinin daha yüksək səviyyədə təşkilinə xidmət etdiyini, yerli əhalinin sərhədçilərə köməyinin, dəstəyinin vacibliyini vurğulamışlar.
Yarışlarda ilk üç yeri tutmuş komandaların - Lənkəran rayonu Vel kənd orta məktəbinin “Xəzər”, Babək rayonu Qaracuq kənd orta məktəbinin “Araz” və Qusar rayonu Ləcət kənd orta məktəbinin “Ləpirçi” komandalarının üzvləri, müəllimlər qiymətli hədiyyələr, Fəxri fərman və diplomlarla mükafatlandırılmışlar.
