Səudiyyə Ərəbistanı Türkiyə ilə neft emalı sahəsində əməkdaşlıq edəcək
Bakı, 19 iyul, AZƏRTAC
Səudiyyə Ərəbistanı və Türkiyə liderlərinin yüksək səviyyədə görüşü zamanı neft və qaz hasilatında əməkdaşlığın artırılmasına yönəlmiş enerji sazişi imzalanıb.
AZƏRTAC “Saudi Press” agentliyinə istinadla xəbər verir ki, saziş Krallığın vəliəhd şahzadəsi Muhammed bin Salman və Türkiyə Prezidenti Rəcəb Tayyib Ərdoğanın iştirakı ilə keçirilən geniş tərkibdə görüşdən sonra imzalanıb.
Səudiyyə Ərəbistanının enerji naziri şahzadə Əbdüləziz bin Salman və Türkiyənin enerji və təbii ehtiyatlar naziri Alparslan Bayraktar tərəfindən imzalanan sənəddə emal olunmuş neft məhsullarının istehsalı, marketinqi, paylanması və ticarəti, eləcə də neft-kimya məhsullarının istehsalı nəzərdə tutulur. Bundan başqa, saziş bərpa olunan enerji və elektrik enerjisi sahəsində əməkdaşlığı, o cümlədən bu sahədə iki ölkə arasında investisiya imkanlarının araşdırılmasını nəzərdə tutur.
Səudiyyəli nazir bildirib ki, iki ölkənin nazirlikləri hidrogen sahəsində əməkdaşlığın gücləndirilməsi, onun istifadəsini artırmaq üçün tədqiqatların aparılması, ikitərəfli sərmayələrin təşviqi ətrafında da müzakirələr aparıblar.
Görüşdə qeyd olunub ki, Türkiyə ilə Krallıq arasında ticarətin həcmi 2022-ci ildə 6,5 milyard dollara, bu ilin birinci yarısında isə 3,4 milyard dollara çatıb. Türkiyənin bütün Körfəz ölkələri ilə ticarəti son 20 ildə 1,6 milyard dollardan təxminən 22 milyard dollara yüksəlib.
Bölmənin digər xəbərləri
