Suriyalı pianoçu: Qara Qarayevin musiqisi rəngarəng çalarlara malikdir
Bakı, 11 fevral, A. Axundova, AZƏRTAC
Bu il Azərbaycan mədəniyyətinin görkəmli nümayəndəsi dahi bəstəkar, akademik, tanınmış alim, pedaqoq və ictimai xadim, SSRİ Xalq artisti, Sosialist Əməyi Qəhrəmanı, SSRİ və Azərbaycan Dövlət mükafatları laureatı Qara Qarayevin anadan olmasının 108-ci ildönümü qeyd olunur.
AZƏRTAC bu münasibətlə dünyanın müxtəlif ölkələrində yaşayan və çalışan musiqiçilər, mədəniyyət və incəsənət xadimləri ilə söhbətlər silsiləsini davam etdirir.
Berlində yaşayan və fəaliyyət göstərən pianoçu, pedaqoq və solist (Suriya) Dialə Hanana Qara Qarayevin yaradıcılığı ilə bağlı təəssüratlarını bölüşüb:
"Dəməşq Konservatoriyasında azərbaycanlı pedaqoq Almaz Mehdiyevadan dərs alarkən, ilk dəfə Qara Qarayevin musiqisi ilə tanış oldum. Onun dərinliyinə və təmkininə, intensivliyinə və melodiyasına heyran qaldım. Bəstəkarın yaradıcılığının canlı və güclü gərginliyi, bütün əsərlərdə eyni dərəcədə ifadə olunmayan milli ruh, yerli intonasiyaların və Avropa formasının qeyri-adi şəkildə sintezi, ərəb ənənələrinə yaxın Şərq melodik çalarları dərhal diqqətimi çəkdi. Qarayevin musiqisinin emosional dərinliyinə qərq oluram. O, rəngarəng çalarları ilə parlayır.
Qarayevin yaradıcılığını yaxından öyrənmək mənə Avropa və Şərq musiqi ənənələrinin bir-birinə necə qarşılıqlı təsir göstərə biləcəyini daha yaxşı başa düşməyə kömək etdi”.
Bölmənin digər xəbərləri
