Şuşa Forumunun koreyalı iştirakçısı Azərbaycanın Qarabağdakı quruculuq işlərindən yazıb
Pekin, 18 avqust, AZƏRTAC
Şuşa Qlobal Media Forumunun Cənubi Koreyadan olan iştirakçısı Ço Ce-hyonun Azərbaycan dövlətinin işğaldan azad edilmiş Qarabağda və Şərqi Zəngəzurda həyata keçirdiyi bərpa-quruculuq işləri, habelə Azərbaycanın turizm potensialı haqqında məqaləsi nüfuzlu “The Korea Times” qəzetində dərc olunub.
AZƏRTAC xəbər verir ki, “Azərbaycana uzun, amma faydalı səyahət” adlı məqalədə müəllif ölkəmizin, paytaxt Bakının turizm potensialından bəhs edib, Şuşaya səfərindən geniş söz açıb. O, işğaldan azad edilmiş ərazilərdə genişmiqyaslı bərpa-quruculuq işlərinin şahidi olduğunu vurğulayıb, Azərbaycanın mədəniyyət paytaxtı olan Şuşanın bir çox şair, musiqiçi, incəsənət adamı yetişdirdiyini yazıb.
Müəllif Azərbaycan Prezidenti İlham Əliyevin Şuşa Qlobal Media Forumunun iştirakçıları ilə görüşündən ətraflı bəhs edərək, dövlətimizin başçısının jurnalistlərin müxtəlif mövzulara dair suallarını səmimiyyətlə cavablandırdığını qeyd edib. Koreyalı jurnalist Prezident İlham Əliyevin mətbuat konfransı bitdikdən sonra dövlətimizin başçısı ilə görüşməyə can atan hər bir iştirakçının istəyinə həssaslıqla yanaşaraq, onlarla xatirə şəkli çəkdirdiyini xüsusi vurğulayıb.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
