Tarixçi: Azərbaycan diplomatik müstəvidə də haqlı olduğunu sübuta yetirir
Bakı, 17 avqust, AZƏRTAC
Azərbaycan birmənalı olaraq diplomatik müstəvidə də haqlı olduğunu sübuta yetirir. Belə ki, ölkəmizin BMT-dəki daimi nümayəndəsi Yaşar Əliyevin qurumun Təhlükəsizlik Şurasının iclasındakı çıxışı çox konseptual idi. Bütün istiqamətləri ilə erməni yalanlarını ortaya qoyan səfir Yaşar Əliyev, Qarabağda hər hansı bir humanitar fəlakətin olmadığını, ermənilərin Azərbaycana reinteqrasiyasının önündə ən böyük əngəlin elə məhz bu separatizm və oradakı qeyri-qanuni erməni silahlı dəstələri, həmçinin onların rəhbərləri olduğunu faktlarla göstərdi. Bununla yanaşı, Ermənistanın sülhə aparan siyasət izləmədiyini, növbəti dəfə beynəlxalq ictimaiyyəti aldatmağa çalışdığını və manipulyasiya etdiyini aydın şəkildə bütün ictimaiyyətə çatdırdı. Bu, Ermənistan dövlətçiliyi üçün böyük bir fiaskodur. Beynəlxalq danışıqlarda guya sülh tərəfdarı olduğunu ifadə edən Ermənistanın baş naziri Nikol Paşinyanın əslində səmimi olmayan mövqeyi də ortaya çıxmış olur. Çünki Ermənistan hökuməti bir tərəfdən Qarabağı Azərbaycanın tərkib hissəsi kimi tanıyır, digər tərəfdən də bizim daxili işlərimizə müdaxilə etməyə çalışır. Baxmayaraq ki, heç bir halda Ermənistan dövləti Azərbaycanla mübarizə apara biləcək gücə və imkana sahib deyil. Bu da bir tərəfdən Ermənistan dövlətinin əslində nə qədər biabırçı bir konsepsiyaya sahib olduğunu, reallıqları düzgün qiymətləndirmədiyini ortaya qoyur. Bundan sonra artıq Ermənistan üçün halqa getdikcə daralır.
Bu sözləri AZƏRTAC-a açıqlamasında tarix üzrə elmlər doktoru Telman Nüsrətoğlu söyləyib.
Regionda sülhə və əməkdaşlığa meyilli siyasət yürüdən Azərbaycanın beynəlxalq əhəmiyyətinin gündən-günə artırdığını deyən T.Nüsrətoğlu bildirib: “Azərbaycan bundan sonra da bütün müstəvilərdə üstünlüyünü, gücünü, haqlılığını ortaya qoymağa davam edəcək. Bu, Azərbaycanın növbəti qələbəsi kimi qeyd edilə bilər. Digər ölkələrdə bu reallıqları nəzərə alaraq artıq heç bir şeyi dəyişdirə bilməyəcəklərini qəbul etməlidirlər və ona görə strateji önəmi yüksələn Azərbaycanla əməkdaşlıq yolunu seçməlidirlər. Əlbəttə, bundan sonrakı proses, soydaşlarımızın ən qısa vaxtda öz yurd-yuvalarına geri dönməsini təmin etməkdir ki, hazırda bu, uğurlu şəkildə həyata keçirilir. Bu, Azərbaycan dövlətinin ciddi bir uğuru kimi qiymətləndirilməlidir”.
Bölmənin digər xəbərləri
