Tbilisidə “Heydər Əliyev: Tale yolları” kitabının gürcü dilində təqdimatı olub
Tbilisi, 12 dekabr, AZƏRTAC
Tanınmış rus yazıçısı Nikolay Zenkoviçin müəllifi olduğu “Heydər Əliyev: Tale yolları” kitabı gürcü dilinə tərcümə olunub.
AZƏRTAC xəbər verir ki, dekabrın 12-də Azərbaycanın Gürcüstandakı səfirliyinin təşkilatçılığı ilə Gürcüstan Milli Elmlər Akademiyasında (GMEA) kitabın təqdimat mərasimi keçirilib.
GMEA-nın prezidenti, akademik Georgi Kvesitadze tədbiri açdıqdan sonra ulu öndər Heydər Əliyevin əziz xatirəsi bir dəqiqəlik sükutla yad edilib.
Akademik bildirib ki, bu gün Azərbaycan xalqının ümummilli lideri Heydər Əliyevin vəfatının 15-ci ildönümüdür. Onun xatirəsi təkcə Azərbaycanda deyil, Gürcüstanda ehtiramla anılır.
Natiq Azərbaycan xalqının Ümummilli Liderinin Gürcüstanla münasibətlərə verdiyi xüsusi diqqətdən söz açaraq bildirib ki, “Heydər Əliyev: Tale yolları” kitabı gürcü oxucuların böyük marağına səbəb olacaq.
O, kitabı gürcü dilinə tərcümə edən İ.Cavaxişvili adına Tbilisi Dövlət Universitetinin professoru Cabuki Kiriyaya təşəkkürünü bildirib.
Sonra çıxış edən Azərbaycanın Gürcüstandakı səfiri Dursun Həsənov Ulu Öndərin azad, müstəqil Azərbaycan dövlətinin möhkəmlənməsindəki və dünyada layiqli yerini tutmasındakı xidmətlərindən söz açıb. Bildirib ki, istər Azərbaycana rəhbərlik etdiyi dövrdə, istərsə də SSRİ kimi nəhəng bir ittifaqın rəhbər strukturlarında çalışdığı vaxtlarda Ulu Öndər Azərbaycanın, eləcə də Cənubi Qafqazın inkişafına daim diqqət göstərib.
Diplomat Azərbaycan ilə Gürcüstan arasında münasibətlərin strateji tərəfdaşlıq səviyyəsinə yüksəldiyini qeyd edib. Bildirib ki, Heydər Əliyevin müəllifi olduğu neft strategiyası, Bakı-Tbilisi-Ceyhan neft, Bakı-Tbilisi-Ərzurum qaz kəmərləri və digər irimiqyaslı regional layihələr Azərbaycanın və Gürcüstanın inkişafında, suverenliyinin möhkəmlənməsində mühüm rol oynayıb.
“Bu gün Ulu Öndərin siyasi kursunun layiqli davamçısı Prezident İlham Əliyevin rəhbərliyi ilə Azərbaycan son 15 ildə misli görünməmiş inkişafa nail olub. Son 15 ildə iqtisadiyyatımız azı 3 dəfə inkişaf edib. Davos İqtisadi forumunun reytinq cədvəlində Azərbaycan rəqabətqabiliyyətlilik üzrə 35-ci yerdə, inkişaf edən ölkələr sırasında isə 3-cü pillədə qərarlaşıb. Valyuta ehtiyatlarımız xarici dövlət borcundan 5 dəfə çoxdur. Bütün bunların kökündə ulu öndər Heydər Əliyevin uzaqgörən siyasəti durur”, - deyə səfir Dursun Həsənov vurğulayıb.
Milli Məclisin deputatı Rasim Musabəyov çıxışında bildirib ki, müstəqil Azərbaycan üçün Gürcüstan vacib ölkə olub. Heydər Əliyev Gürcüstanla münasibətlərə xüsusi önəm verib. Geosiyasi baxımdan Azərbaycan və Gürcüstan Xəzər və Qara dənizləri arasında körpü rolunu oynayır.
O deyib ki, illər ötdükcə Heydər Əliyevin müəllifi olduğu ideya və layihələrin mahiyyəti daha da böyüyəcək.
Ölkəmizə tez-tez səfər etdiyini vurğulayan Gürcüstan parlamentinin vitse-spikeri, Gürcüstan-Azərbaycan parlamentlərarası dostluq qrupunun rəhbəri Z.Dzidziquri bildirib ki, Ulu Öndərin layiqli davamçısı İlham Əliyev bu gün onun siyasətini uğurla davam etdirir.
Gürcüstan ilə Azərbaycanın münasibətlərində heç zaman heç bir problemin olmadığını vurğulayan vitse-spiker bundan sonra da belə olacağına əminliyini vurğulayıb.
Milli Məclisin deputatı, Azərbaycan-Gürcüstan parlamentlərarası əlaqələr üzrə işçi qrupun rəhbəri Əflatun Amaşov bildirib ki, “Heydər Əliyev: Tale yolları” kitabı 2006-cı ildə işıq üzü görüb. Lakin on ildən çox müddətin keçməsinə baxmayaraq, kitab öz aktuallığını qoruyub saxlayıb. Kitabın gürcü dilində çap olunması bunu bir daha sübut edir.
Türkiyənin Gürcüstandakı səfiri Fatma Ceren Yazqan Heydər Əliyevin Azərbaycan və Türkiyəni “bir millət, iki dövlət” adlandırdığını qeyd edib. Bildirib ki, Heydər Əliyev Azərbaycan xalqının və bütün türk dünyasının yaddaşında daim yaşayacaq.
Diplomat Türkiyə, Azərbaycan və Gürcüstanın birgə həyata keçirdiyi layihələrin əhəmiyyətini vurğulayıb. Vurğulayıb ki, bu üç ölkə bölgədə sabitlik, təhlükəsizlik və iqtisadi inkişafa nail olmaq üçün səylərini birləşdiriblər.
Daha sonra çıxış edən gürcü akademiklər, siyasətçilər, ziyalılar ulu öndər Heydər Əliyevin müəllifi olduğu neft strategiyasının, nəqliyyat, infrastruktur layihələrinin əhəmiyyətindən, Azərbaycan-Gürcüstan münasibətlərinin inkişafındakı rolundan, çətin zamanlarda Gürcüstana göstərdiyi yardımlardan danışıb, Ümummilli Liderlə bağlı xoş xatirələrini bölüşüblər.
Sonda Gürcüstanın tanınmış jurnalisti Zurab Dvalinin müəllifi olduğu və ulu öndər Heydər Əliyevə həsr edilmiş “Dostluq əhdi” (Zavet drujbı) sənədli filmi nümayiş olunub.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
