Təyyar Eyvazov: Antibiotik təyin olunmuş pasiyent onun yan təsirlərindən xəbərdar edilməlidir
Bakı, 19 noyabr, AZƏRTAC
Antibiotiklərin düzgün istifadəsi üçün bir sıra ciddi qayda və təlimatlara riayət etmək vacibdir. Çünki onları təyin etmək qərarını verərkən həkim xəstəni bakterial infeksiyadan effektiv şəkildə müalicə məqsədini nəzərdə tutur.
AZƏRTAC xəbər verir ki, bu barədə Səhiyyə Nazirliyinin rəsmi instaqram hesabında keçirilən canlı yayım zamanı nazirliyin mütəxəssis-eksperti, infeksionist Təyyar Eyvazov bildirib.
O deyib ki, “Antibiotiklərdən düzgün istifadə qaydaları”na görə, antibiotiklər yalnız həqiqətən bakterial infeksiyanın olub-olmadığını müəyyən edə bilən müvafiq ixtisaslı həkim tərəfindən təyin edilməlidir. “Antibiotiklər yalnız həkim tərəfindən xəstənin vəziyyəti, simptomları və bəzən test nəticələri (məsələn, ümumi qan analizi və ya bakterioloji kultura) qiymətləndirdikdən sonra təyin olunmalıdır. Antibiotikləri xəstə heç vaxt özünün və ya digər mütəxəssis olmayan insanların qərarı ilə qəbul etməyə başlamamalıdır. Əgər xəstədə müəyyən simptomlar varsa və antibiotiklərə ehtiyacın olub-olmadığını müəyyən etmək və dəqiq diaqnoz üçün müvafiq ixtisaslı həkimə müraciət etmək tövsiyə olunur”,- deyə mütəxəssis vurğulayıb.
Təyyar Eyvazov bildirib ki, antibiotiklər virus xəstəlikləri - soyuqdəymə, KRVİ, qrip üçün istifadə edilməməlidir, çünki onlar viruslara qarşı təsirsizdir və mikrofloraya zərər verir. “Antibiotik təyini zamanı dərmanların qarşılıqlı təsirləri nəzərə alınmalıdır. Digər qəbul olunan dərmanlarla hazırda təyin olunan yeni dərmanın - antibiotikin arzuolunmaz qarşılıqlı təsirlərindən qaçınmaq üçün həkim pasiyentdən qəbul etdiyi digər dərmanlar barədə sorğu etməlidir. Antibiotik təyin olunmuş hər bir pasiyent həmin dərmanın yan təsirlərindən xəbərdar edilməlidir. Bu cür yan təsirlər meydana çıxdıqda, həkimə dərhal məlumat verilməli, pasiyentə ciddi tapşırılmalıdır. Həkimin antibiotiklərin təyininə göstəriş görmədiyi hallarda xəstə və ya onun yaxınları tərəfindən antibiotiklərin təyininə israr etmək olmaz və bu səhv qərara səbəb ola bilər. Bundan başqa, müalicə zamanı kursa ciddi riayət etmək, yəni, dərmanı təyin olunmuş dozada qəbul etmək və dozanı özbaşına artırmaq və ya azaltmaq olmaz. Həmçinin antibiotikin qəbul tezliyinə və vaxtına əməl etmək, tövsiyə olunan intervallara ciddi şəkildə riayət etmək lazımdır (məsələn, hər 8 və ya 12 saatdan bir). Bu, qanda aktiv maddənin tələb olunan konsentrasiyasını saxlayır ki, bu da bakteriyaların öldürülməsi üçün çox vacibdir. Digər bir qayda isə müalicənin tam kursunu tamamlamaqdır. Bu, ən vacib qaydadır. Xəstə özünüzü daha yaxşı hiss etsə belə, dərman qəbulunu dayandırmamalıdır”.
İnfeksionist qeyd edib ki, antibiotikləri qızdırmanın yüksəldiyi bütün hallarda təyin etmək olmaz. “Bu, nəinki düzgün deyil, hətta təhlükəli yanaşmadır. Beləliklə, antibiotiklər yalnız təsdiqlənmiş və ya yüksək dərəcədə şübhəli bakterial infeksiyalar üçün istifadə edilməlidir. Onlar əksər soyuqdəymə, qrip və digər xəstəliklərə səbəb olan viruslara qarşı təsirli deyil. Antibiotiklər allergik reaksiyalara, mədə-bağırsaq pozğunluqlarına və digər ağırlaşmalara səbəb ola bilər. Belə ki, antibiotik normal mikrofloraya da zərər vurur: yalnız patogen bakteriyalar deyil, həm də bədəndəki faydalı bakteriyalar məhv olur. Yadda saxlamaq lazımdır ki, antibiotiklər hərarətsalıcı vasitələr deyil, onlar hərarəti birbaşa aşağı salmır, yalnız temperaturu yaradan bakteriyalar olduqda, onları məhv etməklə hərarətin yüksəlməsi səbəbini aradan qaldıraraq dolayısı ilə onun normallaşmasına səbəb olur”.
Bölmənin digər xəbərləri
