Turistlər üçün səfər sığortası ilə bağlı müzakirələr aparılıb
Bakı, 28 aprel, AZƏRTAC
Azərbaycan Sığortaçılar Assosiasiyasının (ASA) təşkilatçılığı ilə səfər sığortası üzrə işçi qrupunun görüşü keçirilib.
ASA-dan AZƏRTAC-a verilən məlumata görə, görüşdə səfər sığortasının həm daxili, həm xarici turizmdə aktiv istifadəsinin təmin edilməsi üzrə müzakirələr aparılıb. Görüş zamanı beynəlxalq təcrübədə ölkəyə daxil olan turistlər üçün səfər sığortasının məcburi qaydada tətbiqi ilə bağlı fikir mübadiləsi aparılıb.
Eyni zamanda, turizm şirkətlərinin istehlakçılar qarşısında məsuliyyətinin müəyyən edilməsi üçün məsuliyyət sığortasının yaradılmasının əhəmiyyəti vurğulanıb.
Görüş zamanı Azərbaycan Turizm Assosiasiyası (AZTA) tərəfindən turizm sektorunda səfər sığortasının tətbiqi üçün mövcud problemli məqamlar və bununla bağlı həll metodları səsləndirilib.
Görüşün yekunu olaraq sığortaçılar səfər sığortasının ölkəyə daxil olan turistlərə münasibətdə məcburi qaydada tətbiqi ilə bağlı “Turizm haqqında” Qanuna dəyişiklik təklifi və təklifin hazırlanmasından sonra müvafiq qurumlara müraciət edilməsi qərara alınıb.
Bölmənin digər xəbərləri
