Turizm Etikası üzrə Dünya Komitəsinə yeni sədr seçilmişdir
Bakı, 7 sentyabr (AZƏRTAC). Xəbər verdiyimiz kimi, Afrikanın Zambiya və Zimbabve respublikalarının birgə təşkilatçılığı ilə BMT-nin Dünya Turizm Təşkilatının (DTT) Baş Assambleyasının XX sessiyası keçirilmişdir.
AZƏRTAC DTT-nin rəsmi saytına istinadla xəbər verir ki, Azərbaycanın qurumun İcraiyyə Şurasının üzvlüyünə qəbul olunduğu sessiyada Dünya Ticarət Təşkilatının keçmiş baş direktoru Paskal Lami DTT-nin Turizm Etikası üzrə Dünya Komitəsinə yeni sədr seçilmişdir.
Turizm Etikası üzrə Dünya Komitəsi DTT-nin Turizm Etikası üzrə Qlobal Kodeksinin şərhinə, tətbiqinə və vəziyyəti qiymətləndirməsinə məsul olan müstəqil təşkilatdır. Komitənin vəzifəsi kodeksin təbliği və yayılması, həmçinin onun həyata keçirilməsinə nəzarət və qiymətləndirmədir.
DTT-nin Baş Assambleyasının XX sessiyasında Turizm Etikası üzrə Dünya Komitəsinin üzvləri və alternativ üzvlər də seçilmişlər.
Bölmənin digər xəbərləri
