Turizm obyektlərində monitorinqlər bu sahədə işin keyfiyyətli qurulmasına xidmət edir
Bakı, 2 oktyabr (AZƏRTAC). Ölkənin turizm obyektlərində, o cümlədən mehmanxana və mehmanxana tipli obyektlərdə yay mövsümü ilə bağlı Mədəniyyət və Turizm, İqtisadi İnkişaf və Səhiyyə nazirliklərinin əməkdaşları tərəfindən aparılmış birgə monitorinqin nəticələri məlum olmuşdur.
Mədəniyyət və Turizm Nazirliyinin turizm şöbəsindən AZƏRTAC-a bildirmişlər ki, Azərbaycan Prezidentinin müvafiq Fərmanı ilə təsdiq edilmiş “Sahibkarlıq sahəsində aparılan yoxlamaların vahid məlumat reyestrinin forması və aparılması qaydası haqqında Əsasnamə”yə uyğun olaraq aparılan monitorinq 38 şəhər və rayonu əhatə etmişdir.
Monitorinqdə bölgələrin mövsümə hazırlıq səviyyəsi ümumən qənaətbəxş hesab edilmişdir. Lakin mövsümdən əvvəl marketinq və reklam işinin düzgün qurulmaması obyektlərdə illik dolum səviyyəsini xeyli aşağı salmışdır. Bu mövsüm regionlardakı mehmanxanalarda qiymətlər ötən illə eyni səviyyədə qalmışdır.
Monitorinq komissiyası araşdırmaların nəticəsi olaraq bir sıra nöqsanları aşkarlamışdır. Yerlərdə bir çox mehmanxanalar və onlara bərabər tutulan yerləşdirmə obyektlərinin sahiblərinə dəfələrlə müraciət olunmasına baxmayaraq, həmin turizm nöqtələri lisenziyasız fəaliyyət göstərir. Bunun səbəblərini araşdırdıqda məlum olmuşdur ki, problemlər sənədlərin çatışmazlığından qaynaqlanır.
Əksər obyektlərdə xidmətlərin lazımi səviyyədə olmaması müşahidə olunur. Sahibkarlar işçilərin peşə hazırlığı səviyyəsinin artırılmasına maraq, bu istiqamətdə təşəbbüskarlıq göstərmir, hətta nazirlik tərəfindən təşkil olunan treninqlərə də laqeyd yanaşırlar. Bəzi mehmanxanalarda sanitar-gigiyenik vəziyyət o qədər də qənaətbəxş deyil, personalın müvafiq geyim dəstlərinin olmaması faktları aşkar edilmişdir. Baxış keçirilən bölgələrdə lisenziyasız fəaliyyət göstərən yerləşdirmə obyektlərinin əksəriyyəti həm primitiv şəkildə tikilmiş, həm də bu obyektlərdə çalışanların peşə hazırlığı zəifdir.
Nazirlik qeyd olunanları əsas götürərək və turizm sahəsində əldə olunan təcrübəyə istinad edərək, həmçinin bu sahədə yüksək nəticələr əldə etmiş ölkələrin iş prinsiplərini öyrənərək bölgələrdə mövcud problemlərin aradan qaldırılması üçün müəyyən tədbirlər görməyi qərara almışdır. Bu məqsədlə lisenziya müddəti bitmiş və monitorinq nəticəsində yeni aşkar edilmiş mehmanxanalarla bağlı onların rəhbərlərinə xəbərdarlıq məktubu göndərilmişdir. Məktubda qeyd olunan müddət başa çatdıqdan sonra nazirliyə müvafiq sənədlərlə müraciət etməyən mehmanxanaların siyahısı tədbir görülməsi üçün aidiyyəti qurumlara təqdim ediləcəkdir. Həmçinin fəaliyyətində sanitar-gigiyenik normaları pozan bir neçə obyektlə bağlı tədbir görülməsi üçün Səhiyyə Nazirliyinə müraciət göndərilmişdir. Ciddi nöqsanları olan 2 obyektin lisenziyasının fəaliyyəti Mədəniyyət və Turizm Nazirliyinin müvafiq əmri ilə dayandırılmışdır.
Bölmənin digər xəbərləri
