Türkiyədə Azərbaycan diasporunun fəaliyyətinin gücləndirilməsinə həsr olunmuş forum keçiriləcəkdir
Bakı, 3 avqust (AZƏRTAC). Avqustun 5-dən 7-dək Türkiyənin Bodrum şəhərində “Xarici ölkələrdə yaşayan azərbaycanlıların cəmiyyətə inteqrasiyası: mövcud vəziyyət və perspektiv gözləntilər” mövzusunda Forum keçiriləcəkdir.
Diasporla İş üzrə Dövlət Komitəsinin mətbuat xidmətindən AZƏRTAC-a bildirmişlər ki, forumda Azərbaycanın dövlət və hökumət nümayəndələri, deputatlar, dünyanın müxtəlif ölkələrində yaşayan 200-dək soydaşımız iştirak edəcəklər.
Forum çərçivəsində keçiriləcək görüşlərdə və müxtəlif panellər üzrə müzakirələrdə Rusiyada, Türkiyədə, Ukraynada, Gürcüstanda, ABŞ-da və digər dövlətlərdə olan azərbaycanlıların yaşadıqları ölkələrin cəmiyyətinə inteqrasiyası problemləri, Azərbaycan diaspor təşkilatlarının fəaliyyətinin gücləndirilməsi ilə bağlı məsələlər müzakirə olunacaq, konkret təkliflər irəli sürüləcəkdir.
Bundan əlavə, forumda “Azərbaycan diasporu: ensiklopedik məlumat” toplusunun və “Dünya Azərbaycanlılarının III Qurultayı” kitab-diskinin təqdimatı, Azərbaycan incəsənət ustalarının çıxışı nəzərdə tutulmuşdur.
Forumun sonuncu günü yekun sənədlər müzakirə olunacaqdır.
Bölmənin digər xəbərləri
