Ümumrusiya Azərbaycan Konqresinin Ulyanovsk regional bölməsinin sədrinə sui-qəsd edilmişdir

11.09.2012 [19:01]
Çap et
A⁺ A^-

Moskva, 11 sentyabr (AZƏRTAC). Ulyanovsk şəhərinin mərkəzində, Lenin küçəsində Ümumrusiya Azərbaycan Konqresinin (ÜAK) Ulyanovsk regional bölməsinin sədri İslam Hüseynova sui-qəsd edilmişdir.

ÜAK-ın baş katibi Mikayıl Hüseynov Ulyanovsk regional bölməsinin sədrinə sui-qəsd haqqında informasiyanı təsdiqləyərək qeyd etmişdir ki, bu hadisə Konqresin rəhbərliyinin diqqət mərkəzindədir və ÜAK həmin sui-qəsdin səbəblərini diqqətlə araşdırmaq xahişi ilə istintaq orqanlarına müraciət etmişdir. M.Hüseynov qeyd etmişdir ki, İslam Hüseynovla telefon əlaqəsi saxlamışdır. Hüseynovun aldığı yaraların həyatı təhlükəsi yoxdur, lakin onun mühafizəçisi həlak olmuşdur.

Hazırda hadisə yerində operativ istintaq qrupu işləyir. Hüquq mühafizə orqanlarının nümayəndələri hadisə barədə informasiya toplayırlar. Hadisənin təfərrüatı sonradan açıqlanacaqdır.

İslam Hüseynov 2005-ci ildən ÜAK-ın Ulyanovsk bölməsinin sədridir.

Asya Hacızadə

AZƏRTAC-ın xüsusi müxbiri

Moskva