Uşaq Kitab Festivalı: Minlərlə kitabın endirimlə satışı, ustad dərsləri, imza günləri, əyləncəli tamaşalar...
Bakı, 8 aprel, Emil Məlikov, AZƏRTAC
Aprelin 8-də Bakı İdman Sarayında İkinci Uşaq Kitab Festivalının açılış mərasimi keçirilib.
AZƏRTAC xəbər verir ki, Ulu Öndər Heydər Əliyevin 100 illiyinə həsr olunan festivalın təşkilatçıları Mədəniyyət, Gənclər və İdman, Elm və Təhsil nazirlikləri, Ailə, Qadın və Uşaq Problemləri üzrə Dövlət Komitəsi, həmçinin “Azərbaycan Nəşriyyatları Assosiasiyası” İctimai Birliyidir (ANAİB).
Əvvəlcə Dövlət Himni səsləndirilib və Azərbaycanın ərazi bütövlüyü uğrunda canlarından keçən şəhidlərin əziz xatirəsi bir dəqiqəlik sükutla yad edilib.
Açılış mərasimində ANAIB-in sədri Şəmil Sadiq çıxış edərək sərginin əhəmiyyətindən danışıb. O deyib: “Azərbaycan Nəşriyyatları Assosiasiyası” İctimai Birliyi artıq üç ilə yaxındır fəaliyyət göstərir. Bu üç il ərzində kitab təbliğatı istiqamətində xeyli işlər görülür. İlk dəfə 8 nəşriyyat bir arada toplaşmışdı, hazırda isə ölkəmizin demək olar ki, bütün əsas nəşriyyatları ANAIB-in üzvüdür. Biz hətta bölgələrimizdə də kitab tanıtımına başlamışıq. Bu istiqamətdə işlər davam etdirilir. Düşünürəm ki, mütaliə edən, özünü inkişaf etdirmək istəyən uşaqlar yetişdirsək ölkəmizin işıqlı gələcəyinə töhfə vermiş olarıq. Ölkəmizdə belə bir sərgi təşkil etməklə uşaqlarımızın kitaba olan sevgisini daha da artırmış oluruq. Bu bizim prioritetlərimizdəndir. Ötənilki festivalda təqribən 20 minə yaxın insan iştirak etmişdisə, bu il bu rəqəmi biz 50 minə çatdırmaq niyyətindəyik. Qarşıdakı illərdə bu festivalı beynəlxalq festival etməyi hədəfləyirik”.
Ailə, Qadın və Uşaq Problemləri üzrə Dövlət Komitəsinin sədri Bahar Muradova ölkəmizdə belə sərgilərin keçirilməsinin böyük bir hadisə olduğunu vurğulayıb: "Düşünürəm ki, biz hər gün sabahımıza və gələcəyimizə kitabla getsək gələcəyə gedən işıqlı yol daha da asanlaşacaq. Gələcəyə kitabla addımlamağın ən gözəl nümunəsi şahidi olduğumuz bu festivaldır. İkinci dəfə bu festivalda iştirakımdan çox şadam. Bu iş özlüyündə gözəl bir təşəbbüsdür və mən bu sərgidə əziyyəti keçən hər bir kəsə öz təşəkkürümü bildirirəm. Təşkilatçılardan biri olaraq mən də bu prosesdə iştirakımdan qürur duyuram, inanıram ki, belə mötəbər layihələr davamlı olacaq. Kitabla bağlı hədəflər və təbliğat böyük iş sayılır və düşünürəm ki, biz bu yolda davamlı olaraq birgə irəliləməyə çalışmalıyıq. Bu gün uşaqlarımıza qoyulan kapital gələcəyimizə qoyulan kapitaldır. Kitaba sevgi hər zaman olmalıdır və bu cür kitab təbliğatları daimi işlək bir prosesə çevrilməlidir".
Hazırda kitabın işığına toplaşdıqlarını söyləyən Milli Məclisin Mədəniyyət komitəsinin sədri Qənirə Paşayeva ən yaxın, etibarlı, sadiq dostlarının kitablar olduğunu bildirib. “Biz kitabla böyüyürük, öyrənirik, kamilləşirik, intelektual oluruq və mənəviyyatımız daha da dərinləşir, zənginləşir. Bu cür gözəl işdə əməyi keçən hər kəsə dərin minnətdarlığımı bildirirəm. Biz həmçinin bu il Ümummilli Lider Heydər Əliyevin anadan olmasının 100 illiyini qeyd edirik. Ulu Öndər belə deyirdi - "Bizim gələcəyimiz uşaqlarımıza və gənclərimizə nəyi necə öyrətməyimizdən çox asılı olacaq”. Uşaqlarımızın savadlı, vətənpərvər, mənəviyyatlı və dünyagörüşünün zəngin olması millətimizin, dövlətimizin, vətənimizin işıqlı gələcəyi deməkdir. Bunun da ən önəmli yolu kitablara sevgidən keçir. Bu kitab festivalı da məhz buna xidmət edir”,-deyə Milli Məclisin Mədəniyyət komitəsinin sədri vurğulayıb.
Tədbirdə Gənclər və İdman nazirinin müavini İndira Hacıyeva, Mədəniyyət Nazirliyi kitab sənayesi şöbəsinin müdiri Akif Marifli, Təhsilin İnkişafı Fondunun İdarə Heyətinin sədri Elnur Nəsibov, Azərbaycan Nəşriyyatları Assosiasiyası idarə heyətinin üzvü Fatimə Alxaz çıxış edərək festivalların əhəmiyyətini vurğulayıblar və gələcək illərdə də belə sərgilərin keçirilməsinin davamlı olmasını arzulayıblar.
Sərginin ilk günündə proqrama yazıçılar Reyhan Yusifqızı, Amin Oruc, Fatimə Alxaz və qiraətçi Xəzər Süleymanlının nağıl saatı daxil edilib. Uşaqlar üçün Aytac Qəmbərovanın təqdimatında kukla tamaşası, 3 nömrəli Uşaq-Gənclər İnkişafı Mərkəzinin "Vokal" dərnəyinin musiqili proqramı təqdim olunub. Eyni zamanda, tanınmış ədiblərlə yanaşı, gənc yazarlara, debutantlara da diqqət ayrılıb, onların imza mərasimləri, təqdimatları keçirilib.
Növbəti günlərdə Xalq artisti Mənsum İbrahimov və aktyor Kamal Yaşarın nağıl saatı keçiriləcək. Bundan əlavə Türkiyədən gəlmiş qonaqlar yazıçı Suat Turqut, həkim Özge Lokman kimi mütəxəssislərin panelləri baş tutacaq.
Dörd gün davam edəcək tədbirin ideyası “Azərbaycan Nəsriyyatları Assosiasiyası” İctimai Birliyinə məxsusdur. Festivalın könüllü dəstəyini isə “Böyük Qayıdış” Gənclər Təşkilatı İctimai Birliyi həyata keçirir.
Festival çərçivəsində on minlərlə kitabın endirimli qiymətlərlə satışı, ustad dərsləri, məşhurların nağıl saatları, əyləncəli tamaşalar təşkil ediləcək, eyni zamanda iştirakçılar sevilən uşaq yazarları ilə görüşərək onların imzalı kitablarını əldə edə biləcəklər.
Girişi sərbəst olan 2-ci Uşaq Kitab Festivalı aprelin 11-dək davam edəcək.
Bölmənin digər xəbərləri
