Vaqif Xaçaturyanın törətdiyi cinayətlər beynəlxalq konvensiyaların da pozulmasıdır - Politoloq
Bakı, 31 iyul, AZƏRTAC
Azərbaycanın qanunvericiliyinə əsasən haqqında həbs və axtarış qərarı çıxarılmış Vaqif Xaçaturyanın xəstəlik adı ilə Laçın dövlət-sərhəd buraxılış məntəqəsində Beynəlxalq Qızıl Xaç Komitəsinin nəqliyyat vasitəsilə Ermənistana keçərkən saxlanılması işğala və onun nəticələrinə hüquqi qiymətin verilməsi prosesinin tərkib hissəsidir. Azərbaycan dəfələrlə bəyan edib ki, ermənilərin xalqımıza qarşı törədilmiş hər bir əməlinə görə cinayət işi açılıb. Həmin şəxslərin müəyyən edilməsi və haqlarında hüquqi tədbirlərin görülməsi üçün cinayət prosessual hərəkətlər davam etdirilir.
Bu fikirləri AZƏRTAC-a açıqlamasında Ana Vətən Partiyası sədrinin müavini, politoloq Yalçın Hacızadə söyləyib.
Onun sözlərinə görə, Vaqif Xaçaturyan 1991-ci il dekabrın 22-də Xocalı rayonunun Meşəli kəndində 25 nəfər azərbaycanlının öldürülməsində, 14-nün yaralanmasında, 358-nin isə didərgin salınmasında iştirakına görə təqsirləndirilir. Bu səbəbdən onun haqqında Azərbaycan Respublikası Cinayət Məcəlləsinin 103-cü və 107-ci maddələri ilə cinayət işi açılıb. V.Xaçaturyanın törətdiyi soyqırımı və əhalini deportasiya etmə və ya məcburi köçürmə cinayətləri Azərbaycan qanunvericiliyi ilə yanaşı, beynəlxalq konvensiyaların da pozulmasıdır. V.Xaçaturyanın da iştirak etdiyi cinayətkar birliyin milli, etnik və dini zəmində törətdiyi əməlləri 1948-ci il 9 dekabr tarixli “Soyqırımın qarşısının alınması və cəzalandırılması haqqında Konvensiyanın, 1948-ci il 10 dekabr tarixli “İnsan hüquqları haqqında” Ümumi Bəyannamənin və 1966-cı il 10 dekabr tarixli qəbul olunmuş “Mülki və siyasi hüquqlar haqqında” Beynəlxalq Paktın da pozulmasıdır. Həmin beynəlxalq normalar belə əməlləri törədənlərin cəzalandırılmasını tələb edir.
"Azərbaycan xalqına qarşı ağır cinayət törətmiş şəxslərin müəyyənləşdirilərək hüquqi məsuliyyətə cəlb edilmələrini xalqımız çoxdan gözləyir. İşğal nəticəsində böyük həcmdə maddi ziyan vurulmuş, minlərlə insan qətl edilmiş, ağır işgəncələrə məruz qalmış və yüz minlərlə sakin öz yurdundan məcburi köçürülmüşdü. Əlbəttə, Ermənistan dövləti və ayrı-ayrı şəxslər etdikləri cinayət əməlinə görə cavab verəcəklər. V.Xaçaturyanın da saxlanılması zərərçəkənlərin hüquqlarının qorunması, ədalətin bərpa olunması istiqamətində həyata keçirilmiş uğurlu əməliyyatdır. Eyni zamanda, bu, həm milli, həm də beynəlxalq qanunlara uyğundur.
Cinayət törətməkdə ittiham olunan və beynəlxalq axtarışda olan şəxsin saxlanılmasına görə Ermənistan Xarici İşlər Nazirliyinin bəyanatı, törətdikləri ağır cinayətlərin ifşa olunacağı qorxusudur. Ermənistan əgər beynəlxalq hüquqa, insanlığa hörmət etmiş olsaydı, işğal və cinayət hadisələri olmaz, belə əməlləri törətmiş şəxslərin məsuliyyətə cəlb olunması üçün əməkdaşlıq edərdi. Xaçaturyanın müdafiəsi üçün beynəlxalq hüquqa “istinad” edən ölkə minlərlə insanın vəhşicəsinə qətl edilməsində, dörd min azərbaycanlının hələ də itkin düşməsində iştirak edib. Amma nədənsə həmin zaman beynəlxalq hüququ xatırlamayıblar.
Ermənistanın Xarici İşlər Nazirliyi məsələnin mahiyyətindən kənar, manipulativ bəyanat verməklə dünya ictimaiyyətinə guya Azərbaycanda yaşayan ermənilərin təhlükə altında olduqlarını çatdırmaq istəyir. Halbuki Azərbaycan Xarici İşlər Nazirliyin açıqlamasında göstərildiyi kimi, ötən ilin dekabr ayından etibarən Beynəlxalq Qızıl Xaç Komitəsinin vasitəçiliyi ilə 700-ə yaxın erməninin tibbi məqsədlərlə Ermənistana aparılmasına və geri qaytarılmasına şərait yaradılıb. Eyni zamanda, Azərbaycan ərazisində yaşayan erməni əsilli şəxslərə tibbi və digər humanitar xidmətlər göstərməsini dəfələrlə təklif edib.
Həm milli, həm də beynəlxalq hüquq normaları Azərbaycan dövlətinə imkan verir ki, Xocalıda, Malıbəylidə, Quşçularda, Ağdabanda, Ballıqayada, Başlıbeldə və digər şəhər və yaşayış məntəqələrində xalqımıza qarşı soyqırımı və digər ağır cinayətlər törətmiş şəxsləri məsuliyyətə cəlb etsin. Hesab edirəm ki, torpaqlarımızı işğaldan azad edərək beynəlxalq hüququ və bu istiqamətdə qəbul olunmuş beynəlxalq qətnamələrin icrasını təmin etdiyimiz kimi, Azərbaycan xalqına qarşı cinayətlər törətmiş şəxsləri məsuliyyətə cəlb etməklə hüququn, ədalətin bərpasına özümüz nail olmaqla, president formalaşdıracağıq",- deyə o vurğulayıb.
Bölmənin digər xəbərləri
