“Vəkil olmaq istəyirəm” yay məktəbi təşkil edilib
Bakı, 31 iyul, AZƏRTAC
Gənclər və İdman Nazirliyinin, Azərbaycan Respublikasının Gənclər Fondunun, Vəkillər Kollegiyasının və “Gənclərin Maarifləndirilməsinə Dəstək” İctimai Birliyinin birgə təşkilatçılığı ilə gənc hüquqşünas tələbələr üçün Ulu Öndər Heydər Əliyevin 100 illiyinə həsr olunmuş “Vəkil olmaq istəyirəm” yay məktəbi təşkil edilib.
Gənclər Fondundan AZƏRTAC-a verilən məlumata görə, iyulun 26-dan 30-dək Şəki şəhərində keçirilən yay məktəbində iştirak edən 55 hüquqşünas tələbəyə peşəkar biliklərin artırılması məqsədilə prosessual sənədlərin tərtib edilməsi, hüquqi yazı, vətəndaşlarla müsahibələrin keçirilməsi, məsləhətlərin verilməsi qaydaları, natiqlik qabiliyyətinin yaxşılaşdırılması və digər sahələr üzrə təlimlər keçirilib. Düşərgə müddətində, eyni zamanda, gənc hüquqşünaslar üçün təcrübəli vəkillərin iştirakı ilə “Karyera söhbətləri” və səhnələşdirilmiş məhkəmə müsabiqəsi təşkil edilib.
Yay məktəbinin Şəki Olimpiya İdman Kompleksində keçirilən bağlanış mərasimində iştirak edən Gənclər Fondunun icraçı direktor vəzifəsini müvəqqəti icra edən Qədir Xəlilov, Vəkillər Kollegiyasının sədr müavini Şahmar Məmmədov və Şəki-Zaqatala Regional Gənclər və İdman İdarəsinin rəisi Ramiz Mahmudov çıxış edərək Ümummilli Liderin əsasını qoyduğu hüquqi islahatların müasir həyatımızda bəhrəsini görən və bu səbəbdən də hüquqşünaslığın sərbəst, həmçinin də peşəkar forması olan vəkillik sənətini seçən gənclərə daim qanunun aliliyinə hörmət, ədalət mühakiməsinin maraqlarına xidmət etmələri və hüquqi yardımların keyfiyyətinin yaxşılaşdırılması baxımından şəxsi davranışlarının hər zaman nümunəvi olmalarına çağırış edərək gələcəyin vəkillərinə uğurlar arzu ediblər.
Gənclərin peşəkar hüquqşünas kimi ixtisaslaşmasına xidmət edən düşərgənin sonunda iştirakçılara sertifikatlar təqdim edilib.
Qeyd edək ki, gənclərin xüsusi marağına səbəb olan və ikinci dəfə təşkil edilən “Vəkil olmaq istəyirəm” yay məktəbinə, ümumilikdə 20 yerli və xarici universitetdən 350 hüquqşünas tələbə müraciət edib, onlardan bilik və bacarığı, ictimai fəallığı ilə seçilən 55 gənc seçilərək düşərgədə iştirak etmək haqqı qazanıb.
Bölmənin digər xəbərləri
