Bakı, 17 dekabr, AZƏRTAC
Dekabrın 18-də Bakıda Azərbaycanın görkəmli şahmatçısı, Avropa çempionu, beynəlxalq qrosmeyster Vüqar Həşimovun xatirəsinə həsr olunan sayca səkkizinci beynəlxalq turnir start götürəcək.
AZƏRTAC xəbər verir ki, 10 şahmatçının iştirakı ilə baş tutacaq turnir rapid və blits üzrə təşkil olunacaq. Yarış Vüqar Həşimov Şahmat Fondunun təşkilatçılığı, Gənclər və İdman Nazirliyinin, Azərbaycan Şahmat Federasiyasının dəstəyi, SOCAR-ın sponsorluğu ilə keçiriləcək. Yarışa “Fairmont Baku” oteli ev sahibliyi edəcək.
Vüqar Həşimov memorialı ilk dəfə 2014-cü ildə Şəmkirdə keçirilib. Hazırkı dünya çempionu Maqnus Karlsen dörd (2014, 2015, 2018, 2019), Azərbaycan şahmatçısı Şəhriyar Məmmədyarov iki (2016, 2017), ABŞ təmsilçisi Fabiano Karuana bir (2021) dəfə turnirin qalibi olublar.
Mötəbər turnirin iştirakçıları:
 |
Şəhriyar Məmmədyarov (rapid: 2746, blits: 2733) 1985-ci ildə anadan olub. Azərbaycan millisinin heyətində üçqat Avropa çempionu (2009-cu, 2013-cü, 2017-ci) olan Ş.Məmmədyarov 2003-cü və 2005-ci illərdə gənclər arasında dünya çempionu adını qazanıb. Təmsilçimiz 2013-cü ildə sürətli şahmat üzrə dünya çempionu, 2017-ci ildə isə FIDE Qran-Pri seriyasının qalibi olub. |
 |
Azərbaycanın ən güclü şahmatçılarından olan Rauf Məmmədov (rapid: 2578, blits: 2649) 1988-ci ildə dünyaya göz açıb. O, 2004-cü ildə Dubayda keçirilən beynəlxalq turnirdə qazandığı qələbə sayəsində qrosmeyster adına sahib olub. R.Məmmədov müxtəlif illərdə (2009-cu, 2013-cü, 2017-ci) milli komandanın heyətində Avropa çempionu olub. Şahmatçımız 2009-cu ildə ABŞ-da keçirilən 16-cı kateqoriyalı SPICE turnirində qızıl medal qazanıb. 2011-ci ildə “Corsica Masters”, 2015-ci ildə isə Minskdə təşkil olunan blits üzrə Avropa çempionatını birinci pillədə başa vurub. “Vüqar Həşimov” klubunun üzvü olan şahmatçı 2021-ci ildə klublararası Avropa çempionatında üçüncü yeri tutub. |
 |
Macarıstan şahmatçısı Riçard Rapport (rapid: 2802, blits: 2654) 1996-cı ildə doğulub. Qrosmeyster adına gənc yaşlarında sahib olan şahmatçı 2017-ci ildə - 13 yaş 11 ay 6 günlüyündə Macarıstan çempionu olub. Super turnirlərin iştirakçısı və mükafatçısı olan R.Rapport son illər yüksək nəticələr göstərərək dünyanın ən güclü şahmatçıları sırasında yer alıb. |
 |
Çin şahmatçısı Van Hao (rapid: 2721, blits: 2628) 1989-cu ildə anadan olub. On altı yaşadək şahmatçılar arasında Olimpiadanın (2002-ci və 2004-cü illər) ikiqat qalibi olan Van Hao Yakutsk, Dubay, Kuala-Lumpur və Reykyavikdə təşkil olunan beynəlxalq turnirləri qələbə ilə başa vurub. 2010-cu ildə Çin çempionu adına sahib olub. Şahmatçı 2017-ci ildə Asiya çempionatını birinci pillədə başa vurub. 2019-cu ildə Men adasında keçirilən beynəlxalq turnirin qalibi olmaqla iddiaçılar turnirində iştirak hüququ qazanıb və yarışda mübarizə aparıb. |
 |
Semuel Şenklend (rapid: 2657, blits: 2612) 1991-ci ildə anadan olub. 2016-cı ildə ABŞ millisinin heyətində Bakıda təşkil olunan 42-ci Ümumdünya Şahmat Olimp iadasında qızıl medal qazanan Semuel Şenklend iki il sonra ölkə çempionu adına sahib olub. Qrosmeyster 2008-ci ildə 18 yaşadək şahmatçılar arasında dünya çempionatında bürünc, 2010-cu ildə isə ABŞ-da gənclər arasında çempionatda qızıl medal qazanıb. |
 |
Nodirbek Abdusattorov (rapid: 2676, blits: 2666) 2004-cü ildə anadan olub. 2015-ci ildə 11 yaşında Beynəlxalq Şahmat Federasiyasının “Ən yaxşı 100 yeniyetmə” siyahısına daxil olub. Özbəkistanlı şahmatçı bu siyahıya düşmə yaşına görə rekord müəyyənləşdirib. 2021-ci ildə Polşanın paytaxtı Varşavada təşkil olunan rapid üzrə dünya çempionatının qalibi olan qrosmeyster cari ildə Hindistanın Çennai şəhərində keçirilən 44-cü Ümumdünya Şahmat Olimpiadasında Özbəkistan millisinin heyətində qızıl medala sahib olub. |
 |
Abdulla Qədimbəyli (rapid: 2399, blits: 2399) 2002-ci ildə anadan olub. Beş yaşından şahmatla məşğul olan A.Qədimbəyli 2009-cu, 2010-cu illərdə ikiqat Avropa çempionu, 2009-2011-ci və 2014-cü illərdə dördqat Azərbaycan çempionu olub. Şahmatçı 2010-cu ildə Yunanıstanın Halkidiki şəhərində yeniyetmə şahmatçılar arasında 34-cü dünya çempionatının qalibi adını qazanıb. Abdulla Qədimbəyli 2012-ci ildə Avropa kuboku yarışında və 2013-cü ildə dünya çempionatında ikinci, 2014-cü ildə "Dubay Open" beynəlxalq şahmat turnirində üçüncü olub. 2015-ci ildə isə Al-Ain beynəlxalq çempionatında öz həmyaşıdlarını məğlub edərək birinci pillədə qərarlaşıb. 2018-ci ildə kişilər arasında Azərbaycan çempionu olub, 2022-ci ildə qrosmeyster tituluna yiyələnib. |
 |
Valeho Pons (rapid: 2682, blits: 2644) 1982-ci ildə anadan olub. O, 10 və 12 yaşadək şahmatçılar arasından Avropa və dünya çempionatlarında dəfələrlə mükafatçılar sırasında yer alıb. 2006-cı, 2009-cu, 2014-2016-cı illərdə İspaniya çempionu olan Valeho Pons 2000-ci ildə 18 yaşadək idmançılar arasında dünya çempionatını birinci pillədə başa vurub. Dörd dəfə İspaniya millisinin heyətində Ümumdünya Şahmat Olimpiadasında çıxış edən qrosmeyster iki dəfə Avropa çempionatında mübarizə aparıb. |
 |
Aydın Süleymanlı (rapid: 2503, blits: 2481) 2005-ci ildə anadan olub. Yeniyetmələr arasında dünya və ikiqat Avropa çempionu, “Aeroflot Open 2020” turnirinin qalibi olan A.Süleymanlı isə 2021-ci ildə “Vüqar Həşimov” klubunun heyətində klublararası Avropa kuboku yarışında bürünc medala sahib olub. Qrosmeyster 2019-cu ildə milli komandanın heyətində Türkiyənın Çorum şəhərində keçirilmiş 16 yaşadək şahmatçılar arasında Ümumdünya Şahmat Olimpiadasının qalibi olub |
 |
Qukeş Dommaracu (rapid: 2632, blits: 2632) 2006-cı ildə anadan olub. 2012-ci məktəblilər arasında Asiya, 2018-ci ildə isə 12 yaşadək şahmatçılar arasında dünya çempionu olan Q.Dommaracu 12 yaşında qrosmeyster tituluna yiyələnib. Hindistan təmsilçisi tarixdə ikinci ən gənc qrosmeyster adına sahib olan şahmatçıdır. O, 2022-ci ildə Hindistanın Çennai şəhərində keçirilən 44-cü Ümumdünya Şahmat Olimpiadasında birinci lövhədə qızıl medal qazanıb. |
“Vüqar Həşimov Memorialı-2022” dekabrın 23-dək davam edəcək.
