Xocalı faciəsi qurbanlarının xatirəsi Pakistanda da anılmışdır
Bakı, 26 fevral (AZƏRTAC). Azərbaycanın Pakistandakı səfirliyində Xocalı faciəsinin 19-cu ildönümü ilə bağlı anma mərasimi keçirilmişdir.
Səfirlikdən AZƏRTAC-a bildirmişlər ki, “Xocalıya ədalət” kampaniyası çərçivəsində keçirilmiş mərasimdə faciəni əks etdirən film göstərilmiş, İslam Konfransı Gənclər Forumunun mədəniyyətlərarası dialoq üzrə baş əlaqələndiricisi, Heydər Əliyev Fondunun vitse-prezidenti Leyla xanım Əliyevanın ideyası olan “Xocalıya ədalət” kampaniyası çərçivəsində rep üslubunda yazılmış mahnının klipi, eləcə də “Xocalı soyqırımı” videomaterialı göstərilmişdir. İştirakçılara faciə ilə bağlı kitabçalar paylanmışdır.
Bundan əlavə, səfirliyin əməkdaşları İslamabaddakı “Bari İmam” ziyarətgahında Xocalı soyqırımı qurbanlarının xatirəsinə ehsan vermişlər.
Ölkənin aparıcı ingilisdilli “The News” və “Daily Times” qəzetlərinin 25 fevral tarixli nömrələrində isə Xocalı soyqırımı ilə bağlı geniş məqalələr dərc olunmuşdur.
“The News” qəzetində çıxan “Dünya Xocalı soyqırımının müqəssirlərini və zərərçəkənlərini unutmamalıdır” sərlövhəli məqalədə 1992-ci il fevralın 25-dən 26-na keçən gecə ermənilərin Xocalıda azərbaycanlılara qarşı törətdikləri soyqırımı barədə ətraflı məlumat verilmişdir.
Məqalədə erməni millətçilərinin heç bir fərq qoymadan qadın, uşaq, yaşlı insanlar da daxil olmaqla, azərbaycanlıları vəhşicəsinə öldürməsi aktının soyqırımı olduğu beynəlxalq hüququn mənbələrinə istinad edilərək oxucuların diqqətinə çatdırılmışdır. Bundan əlavə, yazıda Xocalı soyqırımı şahidlərinin ifadələrinə yer verilmiş, ermənilərin əsas məqsədinin azərbaycanlıları fiziki cəhətdən məhv etmək olduğu vurğulanmışdır.
Qəzetdə “Vaşinqton Post”, “The İndependent”, “The Times”, “The Sunday Times”, “Le Mond” qəzetlərinin, həmçinin BBC telekanalının məlumatlarından, erməni əsilli yazarların kitablarından Xocalı soyqırımının məhz ermənilər tərəfindən törədildiyini sübut edən sitatlar gətirilmişdir. Burada, həmçinin erməni millətçiliyinin ideoloqlarından olan Z.Balayanın “Ruhumuzun oyanışı” kitabından sitatlar gətirilməklə ermənilərin xəyali “böyük Ermənistan” arzusu naminə azərbaycanlıların fiziki məhvinin motivləri oxucuların diqqətinə çatdırılmışdır.
“Daily Times” qəzetində dərc edilmiş pakistanlı Sumera Şövkətin müəllifi olduğu “Xocalı soyqırımının ildönümü dünya birliyinin bitərəfliyi barədə suallar doğurur” sərlövhəli məqalədə isə Xocalı soyqırımı Xirosima faciəsi ilə müqayisə olunmuş, günahsız insanlara qarşı törədilmiş bu dəhşətli qırğına beynəlxalq ictimaiyyətin biganəlik nümayiş etdirməsi kəskin pislənmişdir. Müəllif qeyd etmişdir ki, bütün dünyanın gözü qarşısında baş verən və aparıcı media qurumları tərəfindən beynəlxalq ictimaiyyətə çatdırılan Xocalı soyqırımının müqəssirləri hələ də mühakimə olunmamışdır.
Məqalədə “necə olur ki, dünyanın böyük dövlətləri öz mənafelərinə uyğun gəldikdə haqq-ədalət çağırışları edərək başqalarını məhkəmə qarşısına çıxarırlar, lazım gəldikdə Filippinin prezidenti evindən çıxarılaraq başqa bir ölkəyə aparılıb mühakimə olunur, bəs niyə azərbaycanlılara qarşı yalnız etnik mənsubiyyətə görə Xocalı soyqırımını törədənlər indiyədək cəzalandırılmamışdır?” - deyə sualla müraciət olunmuşdur. Sonda müəllif Xocalı faciəsinin heç vaxt unudulmayacağını vurğulamış, bu cür soyqırımların təkrarlanmaması üçün dünya birliyini ədalətli mövqe nümayiş etdirməyə və günahkarları cəzalandırmağa çağırmışdır.
Bundan əlavə, Pakistanda nəşr edilən nüfuzlu urdudilli “Daily Jinnah” və “Daily K2” qəzetlərində də Xocalı soyqırımı ilə bağlı geniş məqalələr çap olunmuşdur.
Bölmənin digər xəbərləri
