Xocalı soyqırımı qurbanlarının xatirəsi Tbilisidə yad edilmişdir
Tbilisi, 25 fevral (AZƏRTAC). Fevralın 25-də Tbilisi şəhərində Xocalı soyqırımının 19-cu ildönümünə həsr olunmuş bir sıra tədbirlər keçirilmişdir.
Tədbirlər Azərbaycanın Tbilisidəki səfirliyi əməkdaşlarının, ölkəmizin Gürcüstandakı iş adamlarının və Gürcüstanın azərbaycanlı icması nümayəndələrinin ulu öndər Heydər Əliyevin paytaxtdakı büstü önünə əklillər qoymaları ilə başlanmışdır.
Azərbaycanlıların Tbilisidəki “Varlıq” mədəniyyət mərkəzində keçirilən tədbirdə Azərbaycanın Gürcüstandakı səfiri Namiq Əliyev toplantı iştirakçılarına ermənilərin xalqımıza qarşı törətdikləri vəhşiliklər barədə ətraflı məlumat vermiş, 19 il əvvəl baş vermiş Xocalı soyqırımının bütövlükdə insanlığa qarşı yönəlmiş vandalizm aktı olduğunu vurğulamışdır.
Qeyd etmişdir ki, Prezident İlham Əliyevin, Heydər Əliyev Fondunun prezidenti Mehriban xanım Əliyevanın böyük və gərgin fəaliyyəti nəticəsində dünya ictimaiyyətinin ermənilərin Azərbaycan xalqına qarşı törətdikləri qəddarlıq və vəhşiliklər barədə məlumatlandırılması yönümündə uğurlar getdikcə artır, Azərbaycan informasiya blokadasından xilas olur. Xocalı soyqırımına, ümumilikdə Qarabağ münaqişəsinə obyektiv qiymət verən ölkələrin, siyasi xadimlərin sayı artmaqdadır.
Səfir bildirmişdir ki, buna baxmayaraq ermənilər yenə də öz xam xəyallarından əl çəkmir, bölgədə “böyük Ermənistan”, monoetnik zonalar yaratmağa çalışırlar. Bu siyasət təkcə Azərbaycan üçün deyil, Gürcüstan üçün də təhlükəlidir. Ermənilər bir torpaqda məskunlaşan kimi, həmin ərazini digər millət və xalqlardan təmizləmək üçün müxtəlif üsullara, hiylələrə əl atırlar. Dağlıq Qarabağ, İrəvan xanlığı bunun əyani misalıdır. Ermənilər Gürcüstan ərazisində də həmin məqsədə nail olmaq üçün müxtəlif tədbirlər görürlər. Gürcüstanın Samtsxe-Cavaxeti bölgəsində məskunlaşmış ermənilər əvvəlcə məhsəti türklərinin, sonra isə gürcülərin özlərinin bölgədən çıxarılmasına nail olub, burada növbəti monoetnik zona yaratdılar. Bundan sonra Abxaziyada fəallaşdılar və burada da məqsədə nail olmaq üçün hər şeyi edirlər.
N.Əliyev daha sonra demişdir ki, ermənilərin növbəti addımı Acarıstanla bağlıdır. Onlar burada da fəallaşmışlar. Qara dənizə çıxış, Acarıstanda da monoetnik zona yaratmaq üçün bütün hiyləgərliyə əl atırlar. Qafqazın mütərəqqi qüvvələri onların bu təhlükəli hərəkətlərinin qarşısını almaq üçün birləşməlidirlər. Ədalət Azərbaycanın tərəfindədir və bizim haqq işimiz mütləq qalib gələcəkdir.
Qardabani şəhər 3 nömrəli Azərbaycan ümumi məktəbinin şagirdləri Xocalı və Qarabağ hadisələrinə həsr olunmuş əbədi-bədii kompozisiya göstərmişlər.
Bu təsirli səhnə əsərinə baxdıqdan sonra Gürcüstan veteranlar ittifaqının sədri Qoça Amirecibi demişdir: “Abxaziyada bizim də başımıza Xocalı faciəsinə bənzər faciə gətirilmişdir. Ermənilər burada Baqramyan adına batalyon yaradıb bizim xalqımıza qarşı xüsusi qəddarlıq göstərmiş, gürcü döyüşçülərin başını kəsib futbol topu kimi o yana, bu yana atmışlar. Erməni ermənidir və beləcə də qalacaqdır. Bir daha bu cür faciələrin təkrar olunmamasına çalışmalıyıq”.
Sonra tədbir Tbilisidəki M.F.Axundzadə adına Azərbaycan Mədəniyyət Muzeyində, Heydər Əliyev Fondunun dəstəyi ilə İ.Cavaxişvili adına Tbilisi Dövlət Universitetində yaradılmış “Azərbaycanın dostları klubu” auditoriyasında, “Gürcüstan mənim vətənimdir” cəmiyyətində davam etdirilmişdir. Tədbirlərin iştirakçıları üçün Xocalı faciəsinə həsr olunmuş filmlər göstərilmiş, fotosərgilər açılmış, çoxlu sayda kitablar nümayiş etdirilmişdir.
İslam Əliyev
AZƏRTAC-ın xüsusi müxbiri
Tbilisi
Bölmənin digər xəbərləri
