Yardımlı rayonunda baş verən yanğın lokallaşdırılıb
Bakı, 6 iyul, AZƏRTAC
Masallı Regional Meşə Təsərrüfatı Mərkəzinin Yardımlı rayonu sahəsində baş verən yanğının söndürülməsinə cəlb olunan Ekologiya və Təbii Sərvətlər və Fövqəladə Hallar nazirliklərinin əməkdaşları, yerli icra hakimiyyəti nümayəndələrinin və rayon sakinlərinin birgə mübarizəsi nəticəsində iyulun 6-da yanğın lokallaşdırılıb. Buna baxmayaraq, bəzi ərazilərdə tüstülənmə müşahidə olunur.
Ekologiya və Təbii Sərvətlər Nazirliyinin mətbuat xidmətindən AZƏRTAC-a verilən xəbərə görə, lokallaşdırılan ərazilərdə yanğının və tüstülənmənin tam qarşısını almaq istiqamətində işlər davam etdirilir, çətin keçilən ərazilərə texnika da cəlb olunub.
Xatırladaq ki, iyulun 5-də Masallı Regional Meşə Təsərrüfatı Mərkəzinin əhatə etdiyi çətin keçilən dağlıq ərazidə yanğın hadisəsi baş verib. Havaların anomal isti və quru keçməsi, həmçinin küləkli olması yanğının tam söndürülməsində çətinlik yaradıb.
Bölmənin digər xəbərləri
