Yardımlı rayonunda yanğın baş verən ərazi nəzarət altında saxlanılır
Bakı, 7 iyul, AZƏRTAC
Masallı Regional Meşə Təsərrüfatı Mərkəzinin Yardımlı rayonu ərazisində alov söndürülüb. Ərazidə ayrı-ayrı kiçik yerlərdə hələ də müşahidə olunan tüstülənmə hallarının qarşısını tam almaq məqsədilə müvafiq işlər davam etdirilir.
Ekologiya və Təbii Sərvətlər Nazirliyinin mətbuat xidmətindən AZƏRTAC-a bildirilib ki, ərazini bir neçə gün ərzində nəzarətdə saxlamaq məqsədilə nazirlik əməkdaşları tərəfindən növbətçilik təşkil edilib.
Qeyd edək ki, iyulun 5-də Masallı Regional Meşə Təsərrüfatı Mərkəzinin əhatə etdiyi çətin keçilən dağlıq ərazidə baş verən yanğının söndürülməsinə dərhal Ekologiya və Təbii Sərvətlər və Fövqəladə Hallar nazirliklərinin əməkdaşları və texnikası cəlb olunub, eləcə də yerli icra hakimiyyəti nümayəndələri və rayon sakinləri kömək göstərib.
Havaların isti və quraq keçməsi ilə əlaqədar nazirlik bir daha əhalini təbiətdə olarkən odla ehtiyatlı davranmağa, yanğın təhlükəsizliyi qaydalarına riayət etməyə çağırır.
Bölmənin digər xəbərləri
