Yaxın vaxtlarda “Məzunların məşğulluq reytinqi” portalı istifadəyə veriləcək
Bakı, 24 iyul, AZƏRTAC
Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyinin İdarə Heyətinin sədri Mustafa Abbasbəyli Gəncə səfəri çərçivəsində Azərbaycan Texnologiya Universitetinin tələbə və müəllim heyəti ilə görüşüb.
Agentliyin Strateji kommunikasiya departamentindən AZƏRTAC-a verilən məlumata görə, görüşdə qurumun gənclərin əmək bazarına hazırlanması sahəsində görülən işlər və tədris müəssisələri ilə əməkdaşlıq barədə məlumat verilib.
Qeyd edilib ki, agentliyin əsas missiyalarından biri gənclərin əmək bazarına düzgün hazırlanmasıdır. Gənclərə müasir çağırışlar barədə izahat verilib, onlara gələcəyin peşələri ilə tanış olmaq, təhsilə ciddi əhəmiyyət vermək və əmək bazarını izləmək tövsiyə olunub.
Dövlət Məşğulluq Agentliyinin İdarə Heyətinin sədri yaxın zamanda “Məzunların məşğulluq reytinqi” portalının istifadəyə veriləcəyini və portalın həm məzunlar, həm də işəgötürənlər üçün bir sıra üstünlüklərinin olacağını qeyd edib. O, universitetlərdə fəaliyyət göstərən Karyera mərkəzlərinin əhəmiyyətindən danışaraq agentliyin Mərkəzi Karyera filialının həmin mərkəzlərlə yaxından əməkdaşlıq edildiyini, birgə konfrans və görüşlərin keçirildiyini bildirib. Qeyd olunub ki, filial tərəfindən Karyera Mərkəzləri üçün standartlar hazırlanıb və qarşıdakı dövrdə Texnologiya Universitetində həmin standartlar əsasında Karyera Mərkəzinin yaradılmasına dəstək göstəriləcək.
Görüşdə Texnologiya Universitetinin tələbə və müəllim heyətinin sualları cavablandırılıb.
Bölmənin digər xəbərləri
