YEVLAX ŞƏHƏRİ İCRA HAKİMİYYƏTİNİN BAŞÇISI ELMAR VƏLİYEVİN ÇIXIŞI
- Möhtərəm cənab Prezident!
İcazə verin, səfərinizi böyük ümidlə gözləyən, bu fərəhli anları yaşayan bütün yevlaxlılar adından Sizi salamlayım, onların minnətdarlığını Sizə çatdırım. Siz artıq ikinci dəfədir Yevlaxdasınız və budəfəki gəlişiniz də rayonumuza yeni nəfəs, yeni həyat verəcəkdir.
Möhtərəm cənab Prezident, Sizin rəhbərliyiniz altında həyata keçirilən regionların sosial-iqtisadi inkişafı Dövlət proqramı yevlaxlıların həyatında, onların maddi rifahının yaxşılaşmasında mühüm rol oynayır. Məhz bunun nəticəsidir ki, 2003-cü ildən indiyədək şəhərimizdə 10 421 iş yeri açılmışdır ki, onlardan da 5194-ü daimi iş yerləridir. Əhalinin həyat səviyyəsinin yüksəlməsini səciyyələndirən orta aylıq əmək haqqı 2003-cü illə müqayisədə üç dəfədən çox artmışdır.
Möhtərəm cənab Prezident, 2006-cı ildə 120 milyon manat dəyərində ümumi məhsul buraxılmışdır ki, bu da 2003-cü ildəkindən 75 faiz çoxdur. Bu ilin 9 ayında isə keçən ilin eyni dövrü ilə müqayisədə ümumi daxili məhsulun artımı 55,1 faiz olmuşdur. Məlumat üçün bildirirəm ki, əvvəllər müxtəlif səbəblərdən şəhərimizi tərk edib Rusiyaya və başqa ölkələrə gedən 1405 nəfərdən son dörd ildə 1327 nəfəri Yevlaxa qayıtmış, müxtəlif işlə təmin olunmuşdur.
Yevlaxda Sizin tapşırığınızla sahibkarlığın inkişafı üçün hər cür şərait yaradılmışdır. Şəhərdə yeni tikilən müəssisələrin, demək olar ki, əksəriyyəti sahibkarların vəsaiti hesabına inşa edilmişdir. Məhz bunun nəticəsidir ki, şəhərimizdə 9 yeni özəl bank filialı fəaliyyətə başlamışdır. Yevlaxda son 4 ildə sənaye potensialının artırılması, işsizliyin azaldılması üçün 650 nəfər qadın işləyən “Lalə Tekstil” tikiş fabriki, 300 nəfərin çalışdığı kərpic zavodu, 80 nəfər işçisi olan ARFA mebel fabriki, 300 nəfər işçisi olan “Gilan” dəri emalı zavodu, un məmulatları və konserv məhsulları müəssisələri, kənd təsərrüfatı istehsalçılarına xidmət edən aqrotexnika müəssisəsi, “Aqrolizinq”in regional təchizat bazası, yeni istehsal sahələrinin yaradılması hesabına istehsal gücünü xeyli artırmış qida məhsulları kombinatı, saatda 160 ton asfalt istehsal edən 2 zavod, dəmir-beton zavodu və digər müəssisələr tikilib istifadəyə verilmişdir. Son illər həyata keçirilən tədbirlər nəticəsində sənaye məhsulunun istehsal həcmi dəfələrlə artmışdır. Bu ildən etibarən istehsal olunmuş sənaye məhsulunun 50 faizi İtaliya, İspaniya, Türkiyə, Ukrayna, Gürcüstan, Rusiya və digər ölkələrə ixrac olunur. Bütün maliyyə mənbələri hesabına son 4 ildə tikinti, abadlıq-quruculuq işlərinə kapital qoyuluşunun həcmi 100,8 milyon manat olmuşdur ki, bunun da 83 milyon manatı əsas kapitala yönəlmişdir.
Möhtərəm cənab Prezident, Sizin diqqət və qayğınız sayəsində son 4 ildə 8 kənddə ən müasir yeni məktəb binaları tikilmiş, şəhərin 7 məktəbində isə əsaslı təmir işləri aparılmışdır. Bundan əlavə, 600 yerlik 30 əlavə sinif otağı tikilmişdir. Heydər Əliyev Fondunun “Yeniləşən Azərbaycana yeni məktəb” proqramına uyğun olaraq, rayonumuzda 2 müasir məktəb kompleksi tikilmiş, hər cür avadanlıqla təmin olunmuşdur. İcazə verin, respublikamızda təhsilin inkişafı, milli-mənəvi dəyərlərimizin qorunub saxlanılması və inkişaf etdirilməsində misilsiz işlərin müəllifi olan Heydər Əliyev Fondunun prezidenti, Milli Məclisin deputatı, YUNESKO-nun və İSESKO-nun xoşməramlı səfiri, çox hörmətli Mehriban xanım Əliyevaya yevlaxlıların dərin minnətdarlığını çatdırım.
Möhtərəm cənab Prezident!
Məhz Sizin qayğınız nəticəsində Qarabağ müharibəsi əlilləri və şəhid ailələri üçün 36 mənzilli 3 yaşayış binası tikilərək istifadəyə verilmiş, daha 36 ailəlik binanın inşası nəzərdə tutulmuşdur. Bundan əlavə, şəhər əhalisinin mənzilə olan ehtiyacını ödəmək üçün Kür çayı ətrafında 8 ədəd çoxmərtəbəli yaşayış binasının inşasına başlanmışdır.
Son illər respublikamızda idmanın inkişafına göstərdiyiniz böyük qayğının nəticəsidir ki, indi ölkə idmançılarının zəfər müjdələri müxtəlif beynəlxalq turnirlərdən gəlir. Bu sırada Yevlax idmançılarının da çox uğurları var. Sizin diqqət və qayğınız sayəsində Yevlaxda 2004-cü ildə “Karvan” idman klubu yaradılmışdır. Klubun nəzdində fəaliyyət göstərən “Karvan” futbol komandası ölkənin güclülər dəstəsində uğurla çıxış edir. Yevlax idmanının inkişafında mühüm rol oynayan, Avropa standartlarına cavab verən 6 min yerlik şəhər stadionu, idman-sağlamlıq mərkəzi tikilmişdir. Sizin 2005-ci il 30 avqust tarixli Sərəncamınızla təsdiq edilmiş Azərbaycan gəncliyi Dövlət proqramına uyğun olaraq, şəhərimizdə müasir üslubda Gənclər evinin tikintisi sürətlə davam etdirilir.
Möhtərəm cənab Prezident, əlbəttə, şəhərimizdə görülən işlər barədə bu gün Sizə məlumat vermək olduqca xoşdur, amma hələ bundan sonra göstəriş və tövsiyələrinizə uyğun olaraq görəcəyimiz işlərin miqyası daha böyükdür. Yevlaxlılar inanırlar ki, qısa dövr ərzində, növbəti 5 ildə də Sizin rəhbərliyinizlə ölkədə böyük xarüqələr yaranacaqdır. Yaradan, quran, xalq və vətən üçün çalışan insanlara Sizin verdiyiniz dəyər ruh mənbəyimizdir. Bütün yevlaxlıların arzusunu ifadə edərək bildirmək istəyirəm ki, daim dövlətimizə, dövlətçiliyimizə sadiq olacaq, hər zaman bunu əməli işimizlə sübut edəcəyik. Sizin yüksək etimadınızı doğrultmaq üçün var qüvvəmizlə çalışacağıq.
X X X
Prezident İlham Əliyev görüşdə nitq söylədi.
X X X
Sonra Prezident İlham Əliyev sakinlərlə görüşdü, onların qayğı və problemləri ilə maraqlandı. Sakinlər ulu öndərin tarixi xidmətlərini xatırlatdılar, regionların sosial-iqtisadi inkişafı proqramı ilə bağlı görülən işlərdən məmnunluqlarını bildirdilər və Prezidentin uğurlu siyasətini daim dəstəkləyəcəklərini bildirdilər.
Bölmənin digər xəbərləri
