REGİONLAR
Həm ərəb ölkələrindən, həm də Rusiyadan təkliflər var - Biləsuvarda intensiv meyvə bağı salınıb REPORTAJ VİDEO
Biləsuvar, 3 yanvar, İsmayıl Cəfərli, AZƏRTAC
Taxılçılıq və pambıqçılıq rayonu kimi tanınan Biləsuvarda aqrar sektorun digər sahələri ilə yanaşı, bağçılıq da inkişaf etdirilir. Dörd il əvvəl salınan müasir meyvə bağlarından ötən mövsüm 1000 tondan çox məhsul yığılaraq bazara çıxarılıb.
AZƏRTAC xəbər verir ki, Biləsuvarın Zəhmətabad kəndində 8 hektardan çox ərazidə salınan intensiv meyvə bağlarında növbəti mövsümdə də məhsuldarlığın yüksək olması planlaşdırılır. Payız fəslində bağlardan bol məhsul toplanılıb. Hazırda isə ağaclara qış qulluğu edilir.
Təsərrüfat rəhbəri İsmayıl Mahmudovun sözlərinə görə, meyvə bağları xarici mütəxəssislərin tövsiyələrinə uyğun olaraq, torpaq və iqlim şəraiti nəzərə alınmaqla salınıb. Bağlarda Türkiyədən gətirilən 14 mindən çox yüksək məhsuldar meyvə ağacı - alma, armud, şaftalı, gavalı, heyva və alça əkilib. Ötən mövsüm bağlardan 150 tondan çox heyva, 100 ton alma, ümumilikdə isə 1000 tondan çox müxtəlif meyvə tədarük olunub.
“Məhsuldarlıq yaxşıdır. Növbəti ildə də bu səviyyəyə çatmağı qarşımıza məqsəd qoymuşuq. Bəzi meyvə ağaclarımız 5 ilini gözləmədən məhsuldarlığın pik həddinə çatıb. Heyva və alma ağacları yaxşı bar verir. Növbəti il şaftalı və gavalı ağacları məhsul verəcək. Bağlarımızda yerli iqlim şəraitinə uyğun sortlar əkmişik. 2019-cu ildə məhsulu əsasən yerli bazara çıxarmışıq. Xarici bazara çıxmağı da düşünürük. Müqavilələr bağlanılır. Həm ərəb ölkələri, həm də Rusiyadan təkliflər var”. Bioloq Zaur Səlimov deyir ki, ağacların Günəş şüasından, şaxtadan və digər təbii təsirlərdən qorunması məqsədilə bağın xüsusi torlarla örtülməsi üçün tədbirlər görülüb: “Hazırda ağacların budama dövrüdür. Ağacların suvarılması və gübrələnməsi mərkəzləşdirilmiş qaydada damlama üsulu ilə həyata keçirilir. Düşünürəm ki, növbəti il bağlardan bol məhsul toplanacaq. Artıq bunun təməli qoyulur. Bağlar intensiv üsulla suvarılır. Qrunt sularına ehtiyac qalmayacaq. Ağaclar da çox sağlamdır”.
Təsərrüfatda 15 nəfər daimi, 60 nəfərə yaxın isə mövsümi işlərə cəlb olunub. Növbəti illərdə meyvə bağlarının 30 hektara qədər artırılması planlaşdırılır.