Quba, 9 dekabr, Elxan Yusifli, AZƏRTAC

Prezident İlham Əliyevin, birinci xanım Mehriban Əliyevanın və qızları Leyla Əliyevanın iştirakı ilə dekabrın 6-da "Quba ABAD Factory" qablaşdırma vasitələrinin istehsalı müəssisəsinin açılışı olub. "Quba ABAD Factory" qablaşdırma vasitələrinin istehsalı müəssisəsi “ABAD”ın Qubada ikinci, ümumilikdə isə üçüncü fabrikidir.

“ABAD” publik hüquqi şəxsin direktoru Rüfət Elçiyev AZƏRTAC-ın bölgə müxbirinə bildirib ki, müəssisənin yaradılmasında əsas məqsəd yeni sahibkarlıq subyektinin fəaliyyətə başlaması ilə məşğulluğa əlavə töhfə verməkdir. Bu layihə zərurətdən yarandı. Bilirsiniz ki, 5 il ərzində “ABAD”çılarımızın sayı 500-ə çatıb. Buna görə də qablaşdırma vasitələrinə böyük ehtiyac yaranmışdı. Bu müəssisə sayəsində “ABAD”çılarla yanaşı, kiçik və mikro sahibkarların ehtiyacları da qarşılanacaq. Burada, həmçinin böyük həcmli sifarişlər də qəbul olunacaq.

Müəssisənin yaradılması üçün 3 min kvadratmetr ərazi abadlaşdırılıb. Uzun illər əsaslı təmirə ehtiyacı olan və istifadəsiz qalan bina memarlıq elementləri qorunmaqla tamamilə yenilənərək fabrik kimi fəaliyyətə başlayıb. Yeni yaradılan müəssisədə kartondan müxtəlif qablaşdırma vasitələri, kağız və etiketlərin istehsalı, promo məhsulların hazırlanması, eyni zamanda, tullantı kağızların preslənməsi nəzərdə tutulur.

Müəssisədə ilkin mərhələdə 20, sonra isə 50 nəfərin işlə təminatı reallaşacaq.

“Bir aydan çoxdur ki, buradayıq. Əvvəlcə təlimlərə cəlb olunduq. Mütəxəssislər müasir avadanlıqların iş prinsiplərini bizə öyrətdilər. Biz müxtəlif qablaşdırma vasitələri hazırlayırıq. İş şəraitimiz əladır. Burada yeməkxanamız, asudə vaxtımızı keçirmək üçün xüsusi yerimiz var”, - deyə müəssisədə işləyən Elçin Vəlibəyov bildirib.

Fabrikin əməkdaşı Tariyel Babayev qubalı olsa da, bundan əvvəl Bakı şəhərində çalışıb: “Bir aydır ki, burada fəaliyyətə başlamışam. Biz xüsusi avadanlıqla kartondan qablaşdırma vasitələri, qutular hazırlayırıq. Quba şəhərində yaşayıram. Bundan əvvəl eyni işi Bakı şəhərində görürdüm. Amma "Quba ABAD Factory" qablaşdırma vasitələrinin istehsalı müəssisəsi açılandan sonra burada işləmək təklifini məmnuniyyətlə qəbul etdim. Evimə də yaxındır. İş rejimi də sərfəlidir”.

“ABAD” Prezident İlham Əliyevin 2016-cı ildə imzaladığı Fərmanla yaradılıb. Statistik göstəricilər onu deməyə əsas verir ki, “ABAD” fəlsəfəsi uğurla reallaşır. İlin 10 ayının yekununda “ABAD” 500 ailəyə dəstək göstərib. Nəticədə “ABAD”çıların minlərlə çeşiddə sənətkarlıq, kənd təsərrüfatı və digər növ məhsulları satışa çıxarılıb. Ümumilikdə, 5,5 milyon manat dəyərində məhsulun “ABAD” vasitəsilə satışı həyata keçirilib.