Lənkəran, 22 fevral, İsmayıl Cəfərli, AZƏRTAC

Yeni və gecyetişən narıngi sortu olan “W.Murcott” Lənkəranın ən böyük sitrus təsərrüfatında yetişdirilir. Yanvar ayında yetişən meyvə fevralın axırlarınadək yığılır.

AZƏRTAC xəbər verir ki, bir neçə il əvvəl Lənkəranın Separadi kəndi ərazisində salınan 130 hektarlıq intensiv sitrus meyvə bağında 4 sort narıngi, 2 sort limon, 1 sort qreypfrut ağacları əkilib. Bağın 40 hektarında gecyetişən “W.Murcott” narıngi sortu becərilir. Təsərrüfatın aqronomu Ali Korkmaz deyir ki, yeni sort sitrus ağacı əkildikdən 3 il sonra meyvə verməyə başlayır: “Bu sort narıngi daha çox Türkiyədə əkilir. Məhsuldarlığı da yaxşıdır. Hələ meyvə bağlarımız təzə salınıb. 5-6 ildən sonra tam məhsula düşəcək və bir ağac 80-100 kiloqram meyvə verəcək. Gələcəkdə bu əraziləri 60 hektara çatdırmağı planlaşdırırıq. Onda 1 hektarda bağda 660 ağac olacaq”.

“W.Murcott” sort narınginin gec yetişməsi ticarət baxımından təsərrüfatçılara sərf edir. Məhsul həm yerli, həm də xarici bazar üçün nəzərdə tutulub.

Təsərrüfat rəhbəri Nasir Cəfərzadə bildirib ki, “W.Murcott” sortundan olan narıngi gec yetişməklə yanaşı, şaxtaya da dözümlüdür. “Bunun bazar qiyməti də yaxşı olacaq. Çünki bu sort narıngi yetişəndə bazarda tələbat da çoxalır. Bağlarımız təzə salındığına görə məhsuldarlıq hələlik aşağıdır. Ona görə də ölkə daxilində satış aparırıq. İnşallah yaxın gələcəkdə Rusiyaya da ixrac olunacaq”, - deyə o vurğulayıb.

İl boyu böyük zəhmət və qulluq tələb edən bağlarda 100-ə yaxın işçi çalışır. Bu da ərazidə və ətraf kəndlərdə yaşayan əhali üçün əlavə qazanc imkanları yaradır. Belə işçilərdən biri də Rəvanə Cahangirovadır. Hazırda meyvə dərimi ilə məşğul olan Rəvanə qeyd edib ki, hələ qarşıda budama və dərmanlama işləri də var: “Bağda iş həmişə var. Budama və dərmanlamadan sonra, ağacların dibləri yumşaldılacaq. Gərək bunları edəsən ki, bağ da bizə məhsul versin. Bu bağda damcı suvarma sistemi də quraşdırılıb”.

Ümumilikdə Lənkəranda 1427 hektar sitrus və subtropik meyvə bağı var. Bunun da 85 faizi məhsuldardır. Ötən il təsərrüfatlardan 14 min 360 tona yaxın məhsul yığılıb. 522 hektarı narıngi olan ağaclardan ötən təsərrüfat ili üçün 5393 ton meyvə tədarük edilib.