İQTİSADİYYAT


2045-ci ilədək nəqliyyat vasitələrinin 16 faizi elektrikli avtomobillər olacaq

Bakı, 12 oktyabr, AZƏRTAC

2045-ci ilə qədər qlobal miqyasda nəqliyyat vasitələrinin 16 faizi elektrikli avtomobillər olacaq.

AZƏRTAC xəbər verir ki, bu barədə 2045-ci ilədək qlobal iqtisadiyyat, neft və enerji tələbatı və tədarükü üzrə orta və uzunmüddətli proqnozları özündə cəmləşdirən OPEC-in “Dünya Neft Görünüşü 2020” hesabatında deyilir.

Bildirilir ki, 2045-ci ildə qlobal miqyasda nəqliyyat vasitələrinin ümumi sayı 2,6 milyarda, elektrikli avtomobillərin sayı isə 430 milyona çatacaq. Bu dövrdə elektrikli avtomobillər daxili yanma mühərrikli nəqliyyat vasitələrindən sonra ikinci ən böyük paya sahib olacaq. Elektrikli nəqliyyat vasitələrinin sayı 2030-cu ildə avtomobillərin 5 faizini, 2040-cı ildə isə 13 faizini təşkil edəcək.

Hesabata görə, dünyada elektrikli nəqliyyat vasitələrinin satışları da 2019-2045-ci illərdə 27 faiz artacaq. Təbii qazla işləyən nəqliyyat vasitələri və yanacaqla işləyən avtomobillərin satışlarında proqnozlaşdırılan artıma baxmayaraq, 2045-ci ildə satılan minik avtomobillərinin 60 faizi hibrid elektrikli nəqliyyat vasitələri də daxil olmaqla daxili yanma mühərrikli nəqliyyat vasitələrindən ibarət olacaq.

Dünyada orta və ağır ticari nəqliyyat vasitələrinin çoxunda ənənəvi yanacaq növlərindən istifadə çoxluq təşkil edəcək. Sözügedən dövrdə, xüsusilə ağır ticari nəqliyyat vasitələrində iqtisadi cəhətdən ən cəlbedici seçim olduğundan dizel mühərriklərindən istifadə yenə də davam edəcək.

Sıfır emissiya hədəfləri səbəbindən elektrikli nəqliyyat vasitələrindən daha çox istifadə gözlənilsə də, bəzi ağır ticari avtomobillərdə mayeləşdirilmiş təbii qazdan (LNG) istifadə geniş yayılacaq. Beləliklə, 2019-cu ildə bazarda 96 faiz paya sahib olan ənənəvi yanacaqla işləyən ticari avtomobillərin nisbəti 2045-ci ildə yalnız 79 faizə enəcək.

Elektrikli avtomobillər ən çox OECD ölkələrində yayılacaq

Hazırda elektrikli nəqliyyat vasitələri Çinlə yanaşı, İqtisadi Əməkdaşlıq və İnkişaf Təşkilatına (OECD) üzv olan ABŞ və Avropa ölkələrində daha geniş yayılmaqdadır. OECD gələcəkdə də elektrikli avtomobillərin geniş yayılmasında lider mövqeyini qoruyacaq.

Norveç isə bu sahədə dünya lideri mövqeyini qorumaqda davam edəcək. Təklif etdiyi vergi güzəştləri sayəsində keçən il ölkədə satılan nəqliyyat vasitələrinin 42,4 faizi elektrikli, 13,6 faizi hibrid nəqliyyat vasitələri olub.

OECD bölgəsində elektrikli nəqliyyat vasitələrinin payı 2045-ci ilə qədər 55 faizə yüksələcək. Bu artım Avropa İttifaqının sərt emissiya qaydaları, elektrikli avtomobillərin akkumulyator xərclərinin azalması və performanslarının artması ilə əlaqədardır. Elektrik avtomobillər üzrə daşımalar OECD və Çin xaricindəki bölgələrdə daha az yayılacaq və bu bölgələrdə elektrikli nəqliyyat vasitələrinin payı 2045-ci ilədək 15-20 faizi keçməyəcək.

Batareyalar daha kiçik və daha yüngül olacaq

Gələcəkdə elektrik nəqliyyat vasitələrinin hərəkətliliyindəki inkişaflar batareyaların texnologiyasındakı inkişaflarla sıx əlaqəli olacaq. Batareya texnologiyasında istifadə olunan komponentlərdə əldə ediləcək inkişaflar sayəsində yüksək qiymətli kobaltın istifadəsi azalacaq, əvəzində nikel və manqan istifadəsi artacaq.

Gələcəkdə daha kiçik və daha yüngül batareyaların olması sayəsində nəqliyyat vasitələrinin orta çəkisi aşağı düşəcək və avtomobillərin işə salınması üçün tələb olunan enerjinin miqdarı azalacaq. Bu inkişaflar daxili yanma mühərrikli nəqliyyat vasitələrin istehsalçılarını daha qənaətli motorlar dizayn etməyə və tullantıları azaltmağa təşviq edəcək. Yeni növ koronavirus epidemiyası bu hədəfləri qismən ləngitsə da, elektrikli nəqliyyat vasitələrindən istifadə sürətlə yayılmaqda davam edəcək.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.