20 Yanvar faciəsi qurbanlarının xatirəsi Helsinkidə ehtiramla anılmışdır
Bakı, 21 yanvar (AZƏRTAC). Diasporla İş üzrə Dövlət Komitəsinin mətbuat xidmətindən AZƏRTAC-a bildirmişlər ki, Finlandiya Azərbaycanlıları Assosiasiyası (FAA) Helsinki şəhərində “20 Yanvar Azərbaycan xalqının hüzn və şərəf günüdür” adlı tədbir keçirmişdir.
Mərasimdə Türkiyənin bu ölkədəki səfirliyinin, türk icmalarının nümayəndələri, fin və digər xalqların təmsilçiləri, eyni zamanda Azərbaycan Mədəniyyət və Turizm Nazirliyinin əməkdaşı Cəlil Məlikov və digər qonaqlar iştirak etmişlər.
Əvvəlcə Qanlı Yanvar şəhidlərinin xatirəsi bir dəqiqəlik sükutla yad edilmişdir. FAA-nın sədr müavini Arzu Oqtay 20 Yanvar faciəsinin tarixindən danışmış və demişdir ki, o gecə Bakının dinc sakinlərinin nümayiş etdirdiyi fədakarlıq və qəhrəmanlıq nümunələri xalqın yaddaşından heç zaman silinməyəcəkdir.
C.Məlikov, FAA-nın üzvü Gülzar İsmayıl çıxış etmişlər.
FAA-nın mədəniyyət məsələləri üzrə nümayəndəsi Ülviyyə Cabbarova “Sarı gəlin” xalq mahnısını ifa etmiş, məktəblilər şeirlər söyləmişlər.
Sonda 20 Yanvar faciəsindən bəhs edən sənədli film nümayiş etdirilmişdir.
Bölmənin digər xəbərləri
