Qazaxda günəş enerjisi ilə işləyən artezian quyusu əkin və meşə sahəsinin suvarılmasını təmin edəcək VİDEO
Qazax, 22 avqust, Ruslan Novruzoğlu, AZƏRTAC
Qərb bölgəsində ilk dəfə olaraq günəş enerjisi ilə işləyən artezian quyusu istifadəyə verilib.
AZƏRTAC xəbər verir ki, “Qazax rayonunun Bala Çaylı kəndində suvarma qurğularının quraşdırılması” layihəsi Qərb-Resurs Vətəndaş Cəmiyyətinin İnkişafına Dəstək İctimai Birliyi, Yaponiyanın Azərbaycandakı səfirliyinin maliyyə dəstəyi ilə həyata keçirilib.
Rayonun Bala Çaylı kəndinin sakinləri illərdir iqlimin quraq keçməsi səbəbindən 54 hektar əkin sahəsinin suvarılmasında çətinliklə rastlaşırdılar. Əkin sahələrindən məhsuldarlıq da əldə edilmirdi. Yaxınlıqdakı meşə sahələri isə getdikcə qurumaqda idi. Yeni layihə meşənin və əkin sahələrinin suvarılmasını təmin edəcək. Günəş enerjisi ilə işləyən artezian quyusunun gücü saatda 25 kubmetr təşkil edir.
“Bu yerlərdə əsasən taxıl, arpa, noxud və yarma əkilirdi. Artıq su var, həm yaz, həm də payızda əkin aparılacaq. Artezian quyusu yay aylarında saat 8-dən 18-ə kimi hər gün 400 ton su vuracaq. Bu su meşə və əkin istiqamətlərinə axacaq. Qış aylarında bizim proqnozumuz bu göstəricini 250 tona çatdırmaqdır. Bu da qışın necə keçməsindən asılı olacaq”, - deyə Qərb-Resurs Vətəndaş Cəmiyyətinin İnkişafına Dəstək İctimai Birliyinin sədri Ramil Göyüşov bildirib.
54 hektar əkin sahəsinin və 22 hektar meşə zolağının sulanması üçün nəzərdə tutulan bu suvarma qurğusu artıq təsərrüfat sahiblərinin istifadəsinə verilib.
Təsərrüfat sahibi Malik Yusubov: “Kənd sakinləri su sarıdan əziyyət çəkirdilər. Əkin sahəmizi suvara bilmirdik. Ən çox da yayda korluq çəkirdik. Şükür indi suyumuz var. Bu torpaqlarda hər şey əkmək olar. Özüm əkinlə məşğul olan adamam. Bu artezian quyusunun günəş enerjisi ilə işləməsi bizə çox maraqlı gəldi”.
Günəş panelləri və müasir qurğularla işləyən artezian quyusunun gücünə gəldikdə, yayda günəşli günlərdə minimum saatda 25 kubmetr su vura bilirsə, maksimum gücü isə 45 kubmetrdir. Hazırda yay fəsli olduğundan bir saat ərzində 40-42 kubmetr su istehsal edilir.
“Bu cür layihəni respublikada ilk dəfə burada həyata keçirdik. Keçmiş MBD məkanında ilk dəfə olaraq meşə sahəsi bu üsulla suvarılacaq. Buna görə Yaponiya hökumətinə dərin təşəkkürümüzü bildiririk”, - deyə Qərb-Resurs Vətəndaş Cəmiyyətinin İnkişafına Dəstək İctimai Birliyinin sədri Ramil Göyüşov vurğulayıb.
Layihə çərçivəsində əkin sahələrinin suvarılması təmənnasız həyata keçirilir. Torpaq sahibləri artezian quyusunun suyundan heç bir vəsait ödəmədən rahatlıqla istifadə edə bilirlər. Əsas məqsədlərdən biri də sudan qənaətlə istifadə etməkdir. Bu istiqamətdə maarifləndirmə işləri də aparılır. Gələcəkdə isə artezian quyusunun imkanlarından daha geniş ərazilərin suvarılmasında da istifadəsi nəzərdə tutulur.
Bölmənin digər xəbərləri
