Madriddə Azərbaycanın turizm imkanlarının təqdimatına həsr olunmuş tədbir keçirilib VİDEO
Madrid, 17 noyabr, AZƏRTAC
Azərbaycanın turizm imkanlarının təbliği və tanıdılması məqsədilə noyabrın 16-da Dövlət Turizm Agentliyinin və Azərbaycanın İspaniya Krallığındakı səfirliyinin birgə təşkilatçılığı ilə İspaniyanın Madrid şəhərində tədbir keçirilib.
AZƏRTAC xəbər verir ki, təqdimat tədbirində İspaniyanın hökumət üzvləri, Ümumdünya Turizm Təşkilatının nümayəndələri, İspaniyada akkreditə olunmuş diplomatik korpusunun rəhbərləri, yerli KİV nümayəndələri iştirak ediblər. Tədbirə Azərbaycanın Dövlət Turizm Agentliyinin sədri Fuad Nağıyevin başçılıq etdiyi nümayəndə heyəti də qatılıb.
Azərbaycan Respublikasının İspaniya Krallığındakı səfiri Ramiz Həsənov çıxışında bildirib ki, məşhur İpək Yolu üzərində yerləşən Azərbaycanın əlverişli coğrafi mövqeyi, zəngin tarixi irsi, füsunkar mədəniyyəti, qastronomiyası, qonaqpərvər insanları və ecazkar təbiəti hər zaman turistləri heyran edib.
R.Həsənov qeyd edib ki, Azərbaycan mədəniyyətlərarası və dini tolerantlıq modeli olmaqda davam edir və əsrlər boyu qorunub saxlanılan bu dəyərlər Azərbaycan xalqının həyat tərzinə çevrilməklə yanaşı, Azərbaycan hökumətinin siyasətinin mühüm elementinə çevrilib.
Diqqətə çatdırılıb ki, ölkədə yüksək iqtisadi, sosial və ekoloji tələblərə cavab verən müasir turizm sənayesinin formalaşdırılması və onun ölkə iqtisadiyyatındakı xüsusi çəkisinin daha da artırılması, bu sahədə koordinasiya olunmuş siyasətin həyata keçirilməsi məqsədilə Azərbaycan Respublikası Prezidenti tərəfindən müvafiq sərəncamlar imzalanıb. Azərbaycan Respublikasında turizmin dayanıqlı inkişafını təmin etmək məqsədilə turizm sahəsində dövlət idarəetməsinin əsaslarını, turizm sənayesinin tənzimlənmə mexanizmlərini, turizm ehtiyatlarından səmərəli istifadə qaydalarını özündə ehtiva edən “Turizm haqqında” Azərbaycan Respublikasının Qanunu 2021-ci il dekabrın 27-də qüvvəyə minib.
Azərbaycan 2023-2027-ci illər üzrə İcraiyyə Şurasının Avropa regionu üçün ayrılmış yerlərdən birinə namizədliyini irəli sürmüşdür. Ümidvaram ki, Avropa regional komissiyasının dəyərli etimadı sayəsində Azərbaycan İcraiyyə Şurasında turizmin daha da inkişaf etdirilməsi istiqamətində öz fəaliyyətini davam etdirəcəkdir.
Tədbirdə çıxış edən Dövlət Turizm Agentliyinin sədri Fuad Nağıyev Azərbaycanın 2013-2017 və 2018-2021-ci illərdə BMTÜTT-ün İcraiyyə Şurasına üzv seçildiyini, bu müddət ərzində BMTÜTT-ün Avropa Regional Komissiyasının 49-cu və 57-ci iclasları, İcraiyyə şurasının 110-cu sessiyası daxil olmaqla bir neçə böyük tədbirlərə ev sahibliyi etdiyini bildirib.
Fuad Nağıyev Azərbaycanın 2023-2027-ci illərdə İcraiyyə Şurasına üzv seçilmək üçün yenidən namizədliyinin artıq irəli sürüldüyünü diqqətə çatdırıb.
O, Azərbaycanda son illərdə turizm sahəsinin inkişafına ölkə rəhbərliyi tərəfindən göstərilən diqqətdən danışaraq, Prezident İlham Əliyevə minnətdarlığını bildirib. Agentlik sədri pandemiyadan sonra ölkəmizdə turizmin bərpasının sürətləndiyini, 2021-ci illə müqayisədə 2022-ci ilin yanvar-oktyabr aylarında 118 faiz artım müşahidə edildiyini, ümumilikdə turizm sənayesinin 50 faiz bərpa olunduğunu qeyd edib.
Fuad Nağıyev çıxışında maddi və mədəni irs yerlərinin qorunub saxlanması ilə turizm məqsədləri üçün istifadə edilməsi, eyni zamanda, tanıdılması məqsədini daşıyan “Mədəni irs üçün səyahət” təşəbbüsünü irəli sürüb. O, əhalisinin əksəriyyətinin müsəlman olduğu Azərbaycanın zəngin xristian və yəhudi irsinə, tolerantlıq və multikulturalizm kimi dəyərlərə malik olması, indiyədək UNESCO-nun ümumdünya mədəni irs siyahısına salınan maddi və qeyri-maddi mədəni irs nümunələri haqqında məlumat verib.
Həmçinin işğaldan azad olunmuş ərazilərin işğal müddətində dağıdılaraq məhv edildiyini, Azərbaycan dövləti tərəfindən həmin ərazilərin və dağıdılmış maddi-mədəni irs abidələrinin, o cümlədən Alban-xristian və Qafqaz-alban mədəniyyətinə məxsus kilsə və abidələrin bərpası istiqamətində genişmiqyaslı işlərin aparıldığını diqqətə çatdırıb. Agentlik sədri növbəti illər üçün təşkilatın mədəni irs turizmi ilə yanaşı, təhsil, rəqəmsal turizm və tədbirlər turizminin inkişaf etdirilməsi istiqamətində fəaliyyətinin vacibliyini qeyd edib.
BMTÜTT, həmçinin təşkilatın Avropa Regional Komissiyasına üzv olan ölkələrlə Azərbaycan arasında turizmlə yanaşı, digər sahələr üzrə də iqtisadi əməkdaşlığın artdığını, Azərbaycanın Avropanın enerji təhlükəsizliyində rolunun artmaqda olduğunu qeyd edən Fuad Nağıyev turizmin bu əlaqələrin inkişafına verdiyi töhfələrdən bəhs edib.
Tədbirdə Azərbaycan Turizm Bürosunu Baş icraçı direktoru Florian Zenqstşmid Azərbaycanın turizm imkanları haqqında təqdimatla çıxış edib. O, turizm məhsulları və marşrutları, UNESCO-nun maddi və qeyri-maddi mədəni irs siyahısına salınan nümunələr, eləcə də Azərbaycandakı zəngin alman və yəhudi irsi, qış turizm imkanları haqqında qonaqlara məlumat verib.
Tədbirdə Əməkdar artist, tarzən Şəhriyar İmanov instrumental qrupun müşayiəti ilə Azərbaycan və dünya musiqisi nümunələrini ifa edib.
Tədbir çərçivəsində qonaqlara milli kulinariya nümunələri və şərabçılıq məhsulları təqdim olunub.
AZƏRTAC-ın xüsusi müxbiri
Madrid
Bölmənin digər xəbərləri
