XTQ-nin şəhid hərbi qulluqçularının ailə üzvləri ilə görüş keçirilib VİDEO
Bakı, 8 iyul, AZƏRTAC
Azərbaycan Ordusunun Təlim və Tədris Mərkəzində Xüsusi Təyinatlı Qüvvələrin (XTQ) şəhid hərbi qulluqçularının ailə üzvləri ilə görüş keçirilib.
Bu barədə AZƏRTAC-a Müdafiə Nazirliyinin mətbuat xidmətindən məlumat verilib. Bildirilib ki, əvvəlcə xalqımızın Ümummilli Lideri Heydər Əliyevin və respublikamızın suverenliyi, ərazi bütövlüyü uğrunda şəhidlik zirvəsinə ucalan Vətən övladlarının xatirəsi bir dəqiqəlik sükutla anılıb, Azərbaycan Respublikasının Dövlət Himni səsləndirilib.
Polkovnik Abdulla Qurbani 24 il əvvəl Ulu Öndər Heydər Əliyevin təşəbbüsü ilə yaradılan və bu illər ərzində mütəşəkkil qüvvəyə çevrilən XTQ-nin keçdiyi şanlı döyüş yolundan, onun əsgər və zabitlərinin göstərdiyi şücaət və igidliklərindən, beynəlxalq təlimlərdəki uğurlarından söhbət açıb.
Qeyd olunub ki, Azərbaycan tarixinin şanlı səhifəsi olan İkinci Qarabağ müharibəsində - Vətən müharibəsində möhtəşəm Zəfərin qazanılmasında XTQ-nin müstəsna rolu olub. Onlar Müzəffər Ali Baş Komandan İlham Əliyevin rəhbərliyi ilə müharibənin ilk günündən əsl igidlik, şücaət nümunələri göstərərək bir çox yaşayış məntəqələrini işğaldan azad edib, qoşunlarımızın irəliləməsinə şərait yaradıb, düşmən hədəflərini təyin edərək ona sarsıdıcı və dağıdıcı zərbələr vurulmasına zəmin yaradıb. Şuşaya ilk daxil olaraq Ermənistan ordusunu şəhərin mərkəzindən sıxışdıran qruplarının sayəsində bir çox taktiki qələbələrə nail olub.
Vətən Müharibəsi Qəhrəmanı general-mayor Zaur Zeynalov Vətən üçün layiqli övladlar tərbiyə etdiklərinə görə şəhid valideynlərinə minnətdarlıq edib. General-mayor iştirakçısı olduğu döyüşlərdə şəhidlik zirvəsinə ucalan, müharibədə sağlamlığını itirən xüsusi təyinatlıların əfsanəvi qəhrəmanlıqlarından, hər bir gənc üçün örnək olan mənəvi və iradi keyfiyyətlərindən danışıb, onların heç vaxt unudulmayacağına əminliyini bildirib. Şəhid ailələrinə göstərilən dövlət qayğısının davamlı olduğunu vurğulayan Zaur Zeynalov Müdafiə Nazirliyinin rəhbərliyi və XTQ-nin komandanlığının bu istiqamətdə ardıcıl fəaliyyətlər göstərdiyini görüş iştirakçılarının diqqətinə çatdırıb.
Bakı Bələdiyyə Teatrı aktyorlarının iştirakı ilə nümayiş olunan Abdulla Qurbaninin “Ruhumuzun bayraqdarı şəhidlər” adlı ədəbi-musiqili kompozisiya görüş iştirakçılarına həm duyğulu, həm də qürurverici anlar yaşadıb. Xalqımızın birliyini, həmrəyliyini, dövlətimizin iqtisadi gücünü, ordumuzun əsgər və zabitlərinin şücaətini, şəhid ailələrinin səbir və dözümünü, dəyanətini, qürurunu, dövlət-xalq-ordu birliyi sayəsində əldə etdiyimiz möhtəşəm Zəfəri, eləcə də, Müzəffər Ali Baş Komandanın sərkərdəlik məharətini, dəmir yumruğunun gücünü əks etdirən tamaşa böyük maraqla izlənilib.
Görüş iştirakçılarından olan şəhid Mehrab Niftəliyevin və şəhid Əliqismət Yaqublunun valideynləri təşkilatçılara minnətdarlıq edib, aktyorlara yaradıcılıq uğurları arzulayıb və belə tədbirlərin şəhid ailələrinə mənəvi rahatlıq verdiyini dilə gətiriblər.
Bakı Bələdiyyə Teatrının kollektivi Azərbaycan Ordusunun şəxsi heyətinə, eləcə də şəhid ailələrinə mədəni xidmət göstərilməsində fəaliyyətinə görə Müdafiə Nazirliyi və XTQ komandanlığı tərəfindən mükafatlandırılıb.
Tədbirdə 60-dan çox şəhid övladına Müdafiə Nazirliyinin rəhbərliyi adından hədiyyələr təqdim olunub.
Sonra şəhidlərin ailə üzvlərinin qaldırdıqları problemlərin, məsələlərin tezliklə aradan qaldırılması üçün tədbirlər görüləcəyi bildirilib.
XTQ Qadınlar Şurasının sədri Sevda Mirzəyeva şəhid anaları və onların həyat yoldaşları ilə səmimi söhbət edib, problem və qayğıları ilə maraqlanıb, bundan sonra da şəhid ailələri ilə səmərəli iş aparılacağını deyib.
Respublikanın müxtəlif bölgələrindən gəlmiş XTQ şəhidlərinin ailə üzvləri görüşdən xoş təəssüratlarla və ümidlərlə ayrılıblar.
Bölmənin digər xəbərləri
