Paytaxtdakı 6 nömrəli məktəb-liseydən 144 nəfər məzun olur VİDEO
Bakı, 13 iyun, AZƏRTAC
İyunun 13-də Bakı şəhəri 6 nömrəli məktəb-liseydə “Son zəng” tədbiri keçirilib.
AZƏRTAC-ın məlumatına görə, tədbirdə çıxış edən məktəb-liseyin direktoru Gülşən Orucova bildirib ki, bu il təhsil ocağını 144 məzun bitirir. Onun sözlərinə görə, XI sinif buraxılış imtahanlarında 52 məzun 220 baldan yuxarı nəticə göstərib, 17 şagird fərqlənmə attestatına namizəddir. Məktəbin qızıl medal namizədi isə 11 “B” sinif şagirdi Zəhra Bağırovadır.
Direktor qeyd edib ki, məzunların təxminən 70 faizi xarici universitetlərdən qəbul alıb: “Buraxılış imtahanlarında yüksək nəticələr göstərən şagirdlər həm müəllimlərin, həm də valideynlərin qürur mənbəyinə çevriliblər. Bu il məzunlardan biri 297 bal toplayıb, 52 nəfər isə 220 baldan yuxarı nəticə göstərib”.
Gülşən Orucova vurğulayıb ki, məktəbin şagirdləri cari tədris ilində də mühüm nailiyyətlər əldə ediblər. Belə ki, “Sabahın alimləri” müsabiqəsində dörd layihə ilə təmsil olunan məktəbin qızıl medal qazanan layihəsi ABŞ-də keçirilən beynəlxalq yarışda bürünc mükafata layiq görülüb. Bundan əlavə, şagirdlər fənn olimpiadalarında, idman yarışlarında, mədəniyyət və incəsənət sahələrində də uğurlu nəticələr əldə ediblər.
Tədbirdə çıxış edən elm və təhsil nazirinin müavini Firudin Qurbanov 144 məzunun məktəbi bitirməsinin rəmzi məna daşıdığını qeyd edib. O bildirib ki, gənclər Azərbaycanın gələcək inkişafında mühüm rol oynayacaq, ölkənin uğurlarına öz töhfələrini verəcəklər.
Nazir müavini vurğulayıb ki, məktəbin məzunları hər il yüksək göstəricilərlə ali təhsil müəssisələrinə qəbul olunur, onların əhəmiyyətli hissəsi isə xaricdə təhsil almaq imkanı qazanır. Firudin Qurbanov bildirib ki, 6 nömrəli məktəb-lisey zəngin ənənələrə malik təhsil müəssisəsidir və bu ənənələrin qorunub saxlanılması gələcək nəsillərin üzərinə düşən mühüm vəzifələrdəndir.
Tədbir məzunların təqdim etdiyi musiqi nömrələri və rəqs kompozisiyaları ilə davam edib. Sonda ənənəvi “Son zəng” çalınıb və məzunlar həyatlarının yeni mərhələsinə yola salınıblar.
Qeyd edək ki, bu il respublika üzrə ümumilikdə 116 min 550 nəfər XI sinfi başa vuraraq məzun adını qazanır. Onlardan 55 min 954 nəfəri qız, 60 min 596 nəfəri isə oğlandır. Eyni zamanda, 131 min 407 şagird birinci sinfi uğurla başa vuraraq ibtidai təhsil pilləsini tamamlayır.
2025–2026-cı tədris ilində ölkənin 4 min 194 ümumtəhsil məktəbində 1 milyon 678 min 621 şagird təhsil alıb. Onların təlim-tərbiyəsi ilə 132 min 178 müəllim məşğul olub.
Paytaxt məktəblərində bu il 41 min 941 şagird birinci sinfi, 50 min 219 nəfər IX sinfi, 37 min 222 nəfər isə XI sinfi bitirir.
Böyük Qayıdış Proqramı çərçivəsində bərpa və yenidənqurma işləri aparılan 25 ümumi təhsil müəssisəsinin 11-ində uzun illərdən sonra ilk dəfə olaraq “Son zəng” sədaları səslənib. İşğaldan azad edilmiş ərazilərdə fəaliyyət göstərən məktəblərdə bu il 171 məzun təhsilini başa vurur.
Bölmənin digər xəbərləri
