Berlin, 25 iyun, AZƏRTAC

Azərbaycan mədəniyyətinin, dilinin və milli dəyərlərinin xaricdə yaşadılması istiqamətində görülən işlər Almaniyada da davam edir. Bu fəaliyyətin mühüm ünvanlarından biri də Berlində fəaliyyət göstərən “Xarıbülbül” Azərbaycan Mədəniyyət Evidir. Burada uşaqlar ana dilini öyrənir, milli rəqs və musiqi irsimizlə tanış olur, eyni zamanda, Azərbaycan tarixi və mədəniyyəti haqqında biliklərini zənginləşdirirlər. Müxtəlif yaş qruplarını bir araya gətirən mərkəz artıq Almaniyadakı azərbaycanlı ailələr üçün həm təhsil, həm də mədəniyyət məkanı kimi mühüm rol oynayır.

“Xarıbülbül” Azərbaycan Mədəniyyət Evinin rəhbəri Sevda Badaliouri AZƏRTAC-a müsahibəsində bu mədəniyyət ocağının fəaliyyəti barədə söz açaraq deyib: “Azərbaycan dilini, mədəniyyətini, incəsənətini və milli dəyərlərini yaşadan “Xarıbülbül” Azərbaycan Mədəniyyət Evi Berlində 2022-ci ildən fəaliyyət göstərir, 2024-cü ildən etibarən isə fəaliyyətini Berlindəki Azərbaycan Mədəniyyət Mərkəzində davam etdirir. Burada müxtəlif yaş və səviyyələrə uyğun Azərbaycan dili kursları keçirilir. Hazırda beş qrup - kiçik, orta, başlanğıc dil, irəli və dili yeni öyrənən balacalar üçün qruplar fəaliyyət göstərir. Bundan əlavə, rəqs və nağara kursları da təşkil olunur. Məqsədimiz uşaqlara və gənclərə Azərbaycan dilini və mədəniyyətini sevdirərək onların öz köklərinə bağlılığını gücləndirməkdir. Uşaqlar dərslərə böyük maraqla gəlirlər. Təcrübəli müəllimlərimiz isə onların inkişafına xüsusi diqqət və qayğı ilə yanaşırlar. Bu fəaliyyətlərin həyata keçirilməsində Diasporla İş üzrə Dövlət Komitəsi, Mədəniyyət Nazirliyi və Almaniyadakı səfirliyimiz bizə yaxından dəstək göstərir”.

Mədəniyyət Evinin fəaliyyətində ən vacib istiqamətlərdən biri də məktəbəqədər və kiçikyaşlı uşaqlarla işdir. Bu yaş dövründə dərslər oyunlar, mahnılar və interaktiv fəaliyyətlər vasitəsilə təşkil olunur.

Dərslərin aşağı yaş qruplarından etibarən başladığını vurğulayan müəllim Xəyalə Çiftçi bildirib: “Bu uşaqlar bağçada, məktəbdə alman dilində təhsil aldıqları üçün onlar Azərbaycan dilini həftəsonları burada öyrənirlər. Uşaq mahnıları, uşaq şeirlərini öyrətməklə, bayramlarda Azərbaycanın milli adət-ənənələri ilə bağlı müxtəlif tədbirlər zamanı onlara şeir və mahnılarımızı da öyrədirik. Dərslərimizdə uşaqlara saylar, rəqəmlər, rənglər, sadə riyazi təsəvvürlər, sabah təlimi öyrədirik. Bu biliklər həmin uşaqların yuxarı yaş qruplarına keçdikləri zaman onların inkişafına kömək edir”.

Mədəniyyət Evində Azərbaycan dili dərsləri uşaqların yaş xüsusiyyətlərinə uyğun şəkildə təşkil olunur. Bu barədə məlumat verən Azərbaycan dili müəllimi Səma Kərimli deyib: “Burada orta yaş qrupunda 6-9 yaşlı uşaqlara Ana dilimizi öyrədirik. Hərfləri bir yerdə həm oyunlarla, həm də uşaqlara maraqlı olacaq şəkildə öyrətməyə çalışırıq. Uşaqların mədəniyyətimizi, Ana dilimizi və milli köklərimizi unutmamasına çalışırıq. Ümummilli Liderimiz Heydər Əliyevin də dediyi kimi, biz Amerikada, Almaniyada, başqa ölkələrdə yaşaya bilərik, xoşbəxt də yaşaya bilərik, amma hər bir azərbaycanlının bir Vətəni var, o da Azərbaycandır. Bizim də ən əsas məqsədimiz odur ki, uşaqlarımız öz köklərini unutmasınlar və daim Azərbaycana bağlı qalsınlar”.

Mədəniyyət Evində müxtəlif yaş qrupları üçün Azərbaycan dili kursları təşkil olunur. Dərslər uşaqların yaş və bilik səviyyəsinə uyğun proqram əsasında keçirilir. Azərbaycan dili müəllimi Pərvanə Aslanova hazırda iki müxtəlif yaş qrupunda uşaqlarla işlədiyini vurğulayaraq qeyd edib ki, kiçik yaş qrupu ilə iş zamanı əsas məqsədimiz Ana dilini sevdirmək, yazı və oxu bacarıqlarını inkişaf etdirməkdir: “Əlbəttə ki, bunları müxtəlif interaktiv oyunlar vasitəsilə əyləncəli və maraqlı etməyə çalışırıq. Böyük yaş qrupu ilə iş zamanı isə əsas məqsədimiz oxuyub-anlama və öz fikirlərini inamla ifadə etmək bacarıqlarını inkişaf etdirməkdir. Hər iki yaş qrupu ilə iş zamanı şagirdləri Ana dilimiz, dövlət atributlarımız, milli bayramlarımız, tariximiz, ədəbiyyatımız haqqında məlumatlandırmağa diqqət edirik. Qərib ölkədə yaşasaq da, əsas məqsədimiz azərbaycanlı şagirdlərdə və gənclərdə Vətən sevgisini yaşatmaq, adət-ənənələrimizi və mədəniyyətimizi qorumaq, onlarda milli kimlik duyğularını formalaşdırmaqdır”.

Azərbaycan dilinin tədrisi təkcə uşaqlarla məhdudlaşmır. Mədəniyyət Evində böyüklər üçün də dil kursları təşkil edilir. Bu kurslarda həm Azərbaycan əsilli, lakin dili kifayət qədər bilməyən şəxslər, həm də Azərbaycan dili və mədəniyyətinə maraq göstərən əcnəbilər iştirak edirlər.

“Xarıbülbül” Azərbaycan Mədəniyyət Evində müxtəlif yaş qruplarında Azərbaycan dilini tədris edən Afət Nəbili deyib: “Dilin insanın həyatında nə böyük qapılar açdığını, insanın həyatını necə dəyişdiyini müşahidə edirik. Təbii ki, Azərbaycan dilinin hekayəsi burada bir az fərqlidir. Burada Azərbaycan dili bir səslə, bir ritmlə, yəni həyatında, ailəndə olan insanların bağlılığı ilə başlayır və sonra bu bağlılıq böyük bir marağa səbəb olur. Biz bu marağın dərinləşməsində insanlara yardım edirik, dilin sirlərini açırıq və bu bizi həddindən artıq xoşbəxt edir. Bu işin bir parçası olmaq şəxsən mənim üçün böyük bir fəxrdir”.

Mədəniyyət Evində Azərbaycan dili ilə yanaşı, milli musiqi və rəqs sənətinin tədrisinə də xüsusi önəm verilir. Burada uşaqlar xalq rəqslərimizin incəliklərini öyrənir, səhnə mədəniyyəti qazanır və milli irsimizlə daha yaxından tanış olurlar.

Rəqs müəllimi Səid İbrahimli müsahibəsində uşaqların milli rəqslərimizi öyrənməyə böyük maraq göstərdiklərini bildirib: “Ritm” rəqs qrupunun Avropa filialı olaraq, “Xarıbülbül” Azərbaycan Mədəniyyət Evinin nəzdində fəaliyyət göstəririk. Həftəsonları nağara və rəqs dərslərimiz olur. Çox şadam ki, azərbaycanlı uşaqlar mədəniyyətimizə böyük maraq göstərirlər, onun təbliğində iştirak edirlər. Təbii ki, Berlində yaşayan bütün azərbaycanlı uşaqların dərslərimizdə iştirak etməsini, mədəniyyətimizi daha da yaxından öyrənmələrini və təbliğ etmələrini istərdik. Çünki rəqs həm də uşaqların fiziki inkişafına çox böyük töhfə verir. Biz öz mədəniyyətimizi əcnəbilər qarşısında təqdim edəndə böyük fərəh hissi keçiririk. Uşaqlar da bundan son dərəcə sevinirlər. Ona görə də bütün uşaqları dərslərimizə qoşulmağa dəvət edirəm”.

Dərslər yalnız rəqs texnikasının mənimsənilməsi ilə məhdudlaşmır. Şagirdlərə hər bir rəqsin mənşəyi, tarixi və daşıdığı mədəni məna barədə də məlumat verilir. Məşğələlər zamanı Azərbaycan musiqisinin ritmləri ilə böyüyən uşaqlar öz milli kimliklərini daha dərindən dərk edirlər.

Rəqs dərdlərinin hər həftənin bazar günləri təşkil olunduğunu bildirən rəqs müəllimi Əzizə İbrahimli fikirlərini bizimlə bölüşüb: “Biz xarici ölkədə yaşasaq da, milli kimliyimizi, mədəniyyətimizi, zəngin irsimizi yaşatmağa və təbliğ etməyə xüsusi önəm veririk. Rəqs dərslərimiz vasitəsilə təkcə texniki bacarıqları deyil, eyni zamanda, Vətənimizin ruhunu, tarixini və ənənələrini də şagirdlərimizə öyrədirik. Bu fəaliyyət bizim üçün təkcə bir dərs deyil, həm də doğma mədəniyyətimizi gələcək nəsillərə çatdırmaq, onu yaşatmaq və təbliğ etmək missiyasıdır”.

Beləliklə, “Xarıbülbül” Azərbaycan Mədəniyyət Evi Berlində doğma dilimizi, mədəniyyətimizi və milli dəyərlərimizi yaşadan, təbliğ edən kiçik bir Azərbaycan mühiti formalaşdırılıb. Burada uşaqlar Ana dilini öyrənir, milli musiqi və rəqslərlə tanış olur, öz tarixi və mədəni kökləri haqqında biliklərini zənginləşdirirlər. Bu mədəniyyət ocağı xaricdə yaşayan azərbaycanlı ailələr üçün sadəcə dərs məkanı deyil. Müxtəlif nəsilləri bir araya gətirən, milli kimliyi yaşadan və gələcək nəsillərə ötürən bir körpü rolu oynayan bu mədəniyyət ocağında Vətənə bağlılıq hissi hər dərsdə, hər mahnıda və hər rəqsdə öz əksini tapır, yaşadılır və təbliğ olunur.