Sərt iqlimdə kök atan doğmalıq: Allahverdi Hüseynovun Qazaxıstan hekayəsi VİDEO
Kostanay, 10 iyul, AZƏRTAC
Şimali Qazaxıstanın sərt iqlimində, güclü küləklərə və dondurucu şaxtalara baxmayaraq, bir azərbaycanlının öz əlləri ilə əkdiyi albalı ağacı kök ataraq bar verir. Kostanay vilayətinin Ozyornoye kəndində hər il meyvə gətirən bu ağacı Qərbi Azərbaycanın Göyçə mahalından olan və uzun illərdir Qazaxıstanda məskunlaşan Allahverdi Hüseynov əkib.
AZƏRTAC-ın müxbiri ilə həmsöhbət olan soydaşımız bu uzaq diyara gəlişindən və burada qurduğu doğma mühitdən söz açıb.
“Bu, əkdiyimiz albalı ağacıdır. Gördüyünüz kimi, hazırda üzərində meyvəsi də var. Buranın təbiəti bir az sərtdir, hər ağac bitmir, böyümür”, - deyə Allahverdi müəllim bildirib.
Göyçə mahalının Daşkənd kəndində anadan olduğunu söyləyən həmsöhbətimiz keçmiş günləri belə xatırlayır: “Gəncliyim Göyçədə keçib. Bakıda ali təhsil almışam. Sonradan taleyin hökmü ilə gəlib Qazaxıstana çıxmışıq. Artıq neçə illərdir ki, bu kənddə yaşayırıq”.
Həyətdəki kiçik emalatxana Allahverdi Hüseynov üçün təkcə yaradıcılıq məkanı deyil, həm də ürəyinə bir təsəlli guşəsidir. “Yaradıcı işlərdən çox xoşum gəlir. Baxın, bu, mənim xırda emalatxanamdır. Boş vaxtlarım olan kimi ürəyimdən keçən, mənə doğma olan nəyisə düzəltməyə çalışıram. Bu yaradıcılıq mənə güc verir...”, - deyə o qeyd edib.
Evin ən böyük xəzinəsi, mənəvi sütunu isə divardan asılan sazdır. Azərbaycan mədəniyyətinin və aşıq sənətinin ən mühüm rəmzi olan bu qədim simli alətə soydaşımızın münasibəti xüsusi və müqəddəsdir: “Bu gördüyünüz, Azərbaycan xalqının ən dəyərli simli aləti olan sazdır. Onu burada sevə-sevə, göz bəbəyim kimi qoruyuram. Sadəcə olaraq, son vaxtlar baş-beyin əməliyyatı keçirdiyim üçün daha çala bilmirəm. Amma varlığı bəs edir, onu evimin baş küncündə saxlayıram”, - deyə soydaşımız vurğulayıb.
Allahverdi Hüseynovun həyat hekayəsi, insanın harada yaşamasından, hansı coğrafiyada olmasından asılı olmayaraq, doğma xalqının dilini, mədəniyyətini, sənətini və köklərini qəlbində necə böyük sevgi ilə yaşatdığının parlaq təzahürüdür.
Bölmənin digər xəbərləri
