6-cı “Yerli şirkətlərin tanıtım sərgisi”ndə 300-dək şirkət iştirak edəcək
Bakı, 13 iyun, AZƏRTAC
“Bakı KOB evi”ndə Kiçik və Orta Biznesin İnkişafı Agentliyinin (KOBİA) və “Marsol Group”un birgə təşkilatçılığı ilə 6-cı “Yerli şirkətlərin tanıtım sərgisi”nə həsr olunmuş brifinq keçirilib.
AZƏRTAC xəbər verir ki, tədbirdə KOBİA-nın İdarə Heyəti sədrinin birinci müavini Samir Hümbətov və “Marsol Group”un təsisçisi Tural Mustafayev sərginin məqsədi, təqdim olunacaq yeniliklər barədə ətraflı məlumat verib.
Qeyd edilib ki, iyunun 18-21-də Bakı Ekspo Mərkəzində keçiriləcək “Yerli şirkətlərin tanıtım sərgisi” artıq 6 ildir yerli şirkətlərin məhsul və xidmətlərinin təqdim edildiyi ən böyük platformalardan biridir. Məqsəd yerli şirkətlərin məhsul və xidmətlərini, xüsusilə də ilk dəfə bazara çıxarılacaq brendləri geniş ictimaiyyətə tanıtmaq, xarici bazarlara çıxış imkanlarını artırmaq və biznes subyektləri arasında qarşılıqlı faydalı əməkdaşlıqları təşviq etməkdir.
Builki sərgidə qida, İKT, təhsil, inşaat, sənaye, kənd təsərrüfatı, logistika, tekstil və digər sahələrdə fəaliyyət göstərən 300-ə yaxın yerli şirkət iştirak edəcək. Əvvəlki illərdəki sərgilərdən fərqli olaraq builki sərgidə daha çox şirkət iştirak edir. Sərgidə texnoloji yeniliklər, yeni brendlər, ekoloji təmiz və dayanıqlı istehsalı dəstəkləyən şirkətlərin iştirakına üstünlük verilib. Sahibkarların müraciətləri və ziyarətçilərin marağı nəzərə alınaraq bu il sərgi 4 gün davam edəcək. Sərginin başqa bir fərqi, bu il ilk dəfə olaraq mikro və kiçik sahibkarların iri şirkətlərin rəhbərləri ilə B2B formatlı görüşlərinin təşkil olunmasıdır. Bu, mikro və kiçik sahibkarların iri şirkətlərlə əlaqələrinin genişləndirilməsi və onların təchizat zəncirində iştirakının artırılması məqsədilə edilib. Eyni zamanda, KOBİA tərəfindən mikro və kiçik bizneslərə dəstək məqsədilə sərgidə KOB-lar üçün ödənişsiz stend də qurulub.
Brifinqdə vurğulanıb ki, sərgi təkcə yerli məhsulların nümayişi üçün deyil, həm də Azərbaycan məhsullarının ixracına, xarici tərəfdaşlarla əlaqələrin qurulmasına xidmət edəcək. Bu məqsədlə sərgiyə xarici ölkələrin Azərbaycanda fəaliyyət göstərən ticarət palataları, biznes assosiasiyaları dəvət olunub.
Yerli şirkətlər üçün sərgini əhəmiyyətli edən məhsul və xidmətlərini geniş auditoriyaya tanıtmaq, yeni əməkdaşlıqlar qurmaq və müqavilələr imzalamaq, istehlakçıların fikirlərini öyrənərək məhsullarını təkmilləşdirmək, satışı artırmaq imkanı əldə etmələridir.
Ziyarətçilər isə sərgidə geniş çeşiddə yerli istehsal məhsullarını bir arada görmək, yeni xidmətlər və texnologiyalarla əyani tanış olmaq, yerli məhsulların, xüsusilə də bazara ilk dəfə çıxarılan məhsulların dadına baxmaq, təqdimatlarda iştirak etmək, istehlak etdikləri yerli məhsulların istehsalçıları ilə görüşərək onları maraqlandıran məsələlərlə bağlı sahibkarlarla fikir mübadiləsi aparmaq imkanı əldə edəcəklər.
Sərgidə ziyarətçi qismində iştirak ödənişsizdir. Sərgi ilə bağlı ətraflı məlumat və ziyarətçi qeydiyyatı üçün: https://ebiletstore.com/event/6-ci-yerli-sirketlerin-tanitim-sergisi sərgi iştirakçıları və ziyarətçiləri üçün iyunun 18-21-də saat 10:00-16:30 aralığında hər iki istiqamətdə ödənişsiz avtobus marşrutu (“Koroğlu” metro stansiyasından (Heydər Əliyev prospekti, “Alov” parkı çıxışı)) xidmət göstərəcək. Ödənişsiz avtobusların üzərində “Yerli şirkətlərin tanıtım sərgisi” qeyd ediləcək.
"Kapital Bank"ın rəsmi tərəfdaşlığı ilə keçiriləcək sərginin builki tərəfdaşları Dövlət Məşğulluq Agentliyi, Azərbaycan Dövlət Reklam Agentliyi və İş Adamları Cəmiyyətinin Milli Assosiasiyasıdır (İCMA). “Yerli şirkətlərin tanıtım sərgisi” 2019-cu ildən etibarən keçirilir. 2024-cü ildə keçirilmiş sərgiyə 22 minə yaxın ziyarətçi qatılıb.
Sonda KİV nümayəndələrinin sualları cavablandırılıb.
Bölmənin digər xəbərləri
