Milli Qəhrəman Məhərrəm Seyidovun xatirəsi anılmışdır
Bakı, 15 yanvar (AZƏRTAC). AZƏRTAC xəbər verir ki, Ədliyyə Nazirliyi Ədliyyə Akademiyasında Milli Qəhrəman Məhərrəm Mirəziz oğlu Seyidovun anım günü keçirilmişdir.
Əvvəlcə qəhrəmanın xatirəsi bir dəqiqəlik sükutla yad edilmişdir.
Akademiyanın prorektoru, hüquq üzrə fəlsəfə doktoru İlham Abbasov demişdir ki, 1952-ci ildə Şərur rayonunun Alışar kəndində doğulmuş, polis orqanlarında sahə müvəkkili vəzifəsində işləmiş Məhərrəm Seyidov 1990-cı ildə Sədərəkin müdafiəsi zamanı güllə yağısı altında yoldaşlarını xilas edərkən qəhrəmancasına həlak olmuş, ölümündən sonra Milli Qəhrəman adına layiq görülmüşdür.
Vurğulanmışdır ki, azadlıq, müstəqillik, Vətən uğurunda özlərini qurban verən oğullarımızın xatirəsini qəlbimizdə yaşatmalıyıq, böyüməkdə olan gənc nəsil xalqımızın belə övladlarını tanımalıdır.
Tədbirdə Milli Qəhrəmanlar Beynəlxalq İnformasiya Mərkəzinin rəhbəri, “Milli Qəhrəmanlar” qəzetinin baş redaktoru Mirbəşir Seyidzadə, Məhərrəm Seyidovun döyüş yoldaşları və başqaları çıxış edərək, onun döyüş yolundan, igidliyindən danışmış, xatirələrini bölüşmüşlər.
Milli Qəhrəmanın ailə üzvləri çıxış edərək, onlara göstərilən qayğıya görə Prezident İlham Əliyevə dərin minnətdarlıqlarını bildirmişlər.
Bölmənin digər xəbərləri
