Cari il noyabrın 26-da Bakıda 20-ci Yubiley Beynəlxalq “Caspian Investment Forum” təşkil edilib. “İnvestisiya dalğalarında yenilik rüzgarı” şüarı altında baş tutan bu tədbir “Caspian Energy Club” və Azərbaycan Milli Biznes Assosiasiyasının (MİLLİ.BİZ) təşkilatçılığı, “ABB-İnvest”in baş tərəfdaşlığı, Bakı Fond Birjasının rəsmi tərəfdaşlığı və “Media Balans”ın kreativ tərəfdaşlığı ilə ərsəyə gəlib. 20-ci Yubiley Beynəlxalq “Caspian Investment Forum” beşinci “Caspian Investment Week” çərçivəsində keçirilib. Bu barədə “Caspian Energy Club International”ın idarəedici direktoru Günel Quliyeva məlumat verib.

Regionun və beynəlxalq iqtisadiyyatın aparıcı simalarını bir araya gətirərək, sərmayə mühitinin hazırkı mənzərəsini və gələcək inkişaf trayektoriyalarını əhatə edən forum çərçivəsində genişmiqyaslı fikir mübadiləsi aparılıb. İştirakçılar bazar trendləri, kapital axınları və innovativ maliyyə alətləri barədə real təcrübələrini bölüşərək, qarşılıqlı əməkdaşlığın gələcək istiqamətlərini müzakirə ediblər.

Tədbirdə Azərbaycanla yanaşı, Çexiya, Qazaxıstan, Gürcüstan, Özbəkistan, Türkiyə, Macarıstan və ABŞ-dan olan sahibkarlar və sərmayədarlar da iştirak edərək çoxşaxəli biznes dialoqu yaradıblar. Forumun açılış nitqini təqdim edən “Caspian Energy Club”ın sədri və qrupun baş icraçı direktoru Telman Əliyev həm klubun fəaliyyəti, həm də forumun strateji əhəmiyyəti haqqında iştirakçılara geniş məlumat verib.

Açılış mərasimindən sonra Mərkəzi Bankın nümayəndəsi tərəfindən əsas məruzə təqdim olunub, regional kapital bazarlarının inteqrasiyası, maliyyə sabitliyi və dayanıqlı inkişaf istiqamətləri ətrafında dair müzakirələr aparılıb.

“Qiymətli kağızların buraxılması yolu ilə kapital cəlbi” adlı birinci panel iri korporasiyaların, investisiya fondlarının və bank sektorunun aktual məsələlərinə həsr olunub. Paneldə “Azərsun Holdinq”in baş maliyyə direktoru Nejat Ersoy, “Samruk-Kazyna”nın İnvestisiyalar üzrə rəhbəri Balım Jassıbek, Asiya İnkişaf Bankının Özəl Sektorun İnkişafı üzrə baş inzibatçısı Sənan Şabanov və “Bank of Baku”nun Xəzinədarlıq departamentinin direktoru Özal Talıblı çıxış ediblər. Müzakirələrə “ABB Invest İnvestisiya Şirkəti” QSC-nin icraçı direktoru Nadir Babazadə moderatorluq edib.

“Qiymətli kağızların təkrar bazarda tədavülü” adlı ikinci panel kapital bazarlarının çevikliyi, investor etimadının artırılması və bazar infrastrukturunun təkmilləşdirilməsi kimi mövzular ətrafında səslənən müzakirələrlə yadda qalıb. Panelin spikerləri Azərbaycan Respublikasının Milli Depozit Mərkəzinin İdarə Heyətinin üzvü Ramin Nurəhmədov, Bakı Fond Birjasının Əməliyyat departamentinin direktoru Mətin Yolçiyev, “DriveWealth” şirkətinin Strateji Biznes üzrə Vitse-Prezidenti Selom Tetteh və “Galt & Taggart” şirkətinin sədr müavini Ketevan Toidze olub. Panelin moderatoru qismində “ABB Invest İnvestisiya Şirkəti” QSC-nin Biznesin inkişafı departamentinin direktoru Elçin Məmmədov çıxış edib.

Panel müzakirələrinin sonunda hər iki panelin spikerlərinə 20-ci Beynəlxalq “Caspian Investment Forum”un uğurlu təşkilinə verdikləri dəstəyə görə təşəkkürnamə sertifikatları təqdim edilib.

Forumun rəsmi hissəsi başa çatdıqdan sonra ənənəvi networking sessiyası baş tutub, iştirakçılar yeni işgüzar əlaqələr qurmaq, potensial tərəfdaşlıqları müzakirə etmək və gələcək birgə layihələr üçün perspektivləri müəyyənləşdirmək imkanı əldə ediblər.

“İqtisadiyyatın əsasını insanların bir araya gələrək formalaşdırdığı güvən, əməkdaşlıq və ortaq ideyalar təşkil edir. Hər uğurlu investisiya hekayəsinin kökündə də məhz səmimi ünsiyyət və uzaqgörən əməkdaşlıq dayanır. Biz ümid edirik ki, 20-ci Beynəlxalq “Caspian Investment Forum” bu ruhu daha da gücləndirəcək, yeni tərəfdaşlıqların yaranmasına, innovativ layihələrin formalaşmasına və regional iqtisadi münasibətlərin keyfiyyətcə yeni mərhələyə qədəm qoymasına təkan verəcək”, - deyə Günel Quliyeva bildirib.

“Caspian Energy Holding” haqqında qısa məlumat:

“Caspian Energy Holding” 2025-ci ildə “Caspian Energy” brendi altında fəaliyyət göstərən bütün networking platformalar, media layihələr, forumlar və mükafatları vahid "Milli.Biz" ekosistemi daxilində birləşdirmək məqsədilə təsis edilmişdir. "Milli.Biz" ekosistemi əsasında “Caspian Energy Club”, Avropa ilə İqtisadi Əməkdaşlıq İctimai Birliyi və Azərbaycan Milli Biznes Assosiasiyası vasitəsilə 100-dən çox ölkədən olan sahibkarlara networking qurmaq imkanı yaradılacaq.

“Caspian Energy Holding”in tərkibinə aşağıdakı qruplar daxildir: “Caspian Energy Club”, “Caspian Energy Club International”, “Caspian Energy EXIFOR Group”, “Caspian Energy International Media Group”, “Award Organizers Group”, “Caspian Energy Research Group”, “Caspian Energy Entertainment Group”, “Caspian Energy Jobs Group”.

“Caspian Energy Club”a daxil olan sahibkarlar vahid "Milli.Biz" ekosistemi çərçivəsində hal-hazırda mövcud olan bütün xidmətlərlə yanaşı hüquq, maliyyə, turizm, konsaltinq və digər xidmətlərdən yararlana biləcəklər. "Milli.Biz" ekosisteminə inteqrasiya olunan qlobal loyallıq proqramı da tətbiq ediləcək.

2002-ci ildə dünyanın iri transmilli, dövlət və özəl neft-qaz və enerji şirkətləri tərəfindən yaradılan, mənzil-qərargahı Bakıda yerləşən “Caspian Energy Club” dünyanın 50 ölkəsindən 5000-dən çox şirkəti birləşdirən və dinamik inkişaf edən beynəlxalq biznes networking platformasıdır. “Caspian Energy Club” biznes-hökumət dialoqunun fəal iştirakçısıdır və əsas məqsədlərindən biri, Azərbaycanda və “Caspian Energy Club”ın fəaliyyət göstərdiyi digər ölkələrdə investisiya və işgüzar mühitin yaxşılaşdırılmasıdır.

“Caspian Energy Club International” 2023-cü ildə “Caspian Energy Club”ın beynəlxalq layihələrini və dünyanın 63 şəhərində fəaliyyət göstərən xarici ofisləri vahid standartlar əsasında idarə etmək məqsədilə yaradılıb. Bu strukturun nəzdində idarə olunan və yaxın 7 il ərzində dünyanın 100 ölkəsində nümayəndəlik açılması planlaşdırılan Azərbaycan Milli Biznes Assosiasiyası (MİLLİ.BİZ) – ölkə daxilində və ölkə hüdudlarından kənarda Azərbaycan sahibkarlarını birləşdirən, regionlarda istehsal olunan məhsul və xidmətləri beynəlxalq bazarlara çıxaran, həmçinin regionlara beynəlxalq investisiyaların cəlb edilməsində aktiv rol oynayan vahid işgüzar platformadır.

2004-cü ildən fəaliyyət göstərən “Caspian Energy EXIFOR Group” dünyanın 20-dən çox ölkəsində “Caspian Energy Forum”, “Caspian Investment Forum”, Milli Biznesin İnkişafı Forumu, Milli Maliyyə Əlçatanlığı Forumu, “Caspian Innovation Forum” və iqtisadiyyatın fərqli istiqamətlərini əhatə edən beynəlxalq və milli forumlar, “meetup”lar və dəyirmi masalar təşkil edir.