® “Bir” İçərişəhərin rəqəmsallaşdırılmasına dair Anlaşma Memorandumu imzalayıb
Qafqazın ilk tam inteqrasiya olunmuş bankçılıq, ödəniş, e-ticarət ekosistemi olan “Bir” və "İçərişəhər" Dövlət Tarix-Memarlıq Qoruğu İdarəsi arasında Anlaşma Memorandumu imzalanıb. Tərəfdaşlığın əsas məqsədi Azərbaycanın ən mühüm mədəniyyət ocaqlarından olan İçərişəhərdə sakinlər, sahibkarlar və turistlər üçün təqdim edilən təcrübəni rəqəmsal innovasiyalarla zənginləşdirməkdir.
Memoranduma əsasən, “Bir” ekosistemi UNESCO-nun Ümumdünya İrs Siyahısına daxil olan İçərişəhərdə ziyarətçilərin rahatlığını artırmaq üçün süni intellektə əsaslanan rəqəmsal həllər təqdim edəcək. Həyata keçirilməsi planlaşdırılan təşəbbüslərə ağıllı naviqasiya alətləri, çoxdilli rəqəmsal bələdçilər, QR-koda əsaslanan məlumat sistemləri, süni intellekt dəstəkli çatbot və istifadəçi təcrübəsini asanlaşdıracaq vahid mobil veb-sayt daxildir.
“Bir” ekosisteminin rəhbəri Fərid Hüseynov çıxışı zamanı layihənin əhəmiyyətini vurğulayaraq ölkəmiz adına vacibliyini qeyd edib: "Bu tərəfdaşlıq texnologiya və innovasiyalar vasitəsilə insanların gündəlik həyatını daha sadə, ağıllı və əlçatan etmək əzmimizi əks etdirir. Biz bankçılıq, ödəniş və e-ticarət ekosistemimizin üstünlüklərini bir araya gətirərək daha rahat və inteqrasiya olunmuş şəhər mühiti yaratmaqla Azərbaycanın rəqəmsal transformasiyasına dəstək olmaqdan qürur duyuruq. İçərişəhər ölkəmizin ən mühüm mədəniyyət rəmzlərindəndir. İnanırıq ki, sakinlər və qonaqların bu tarixi məkan və onun xidmətləri ilə təmasına innovativ həllər qatmaq böyük perspektivlər vəd edir".
"İçərişəhər" Dövlət Tarix-Memarlıq Qoruğu İdarəsinin İdarə Heyətinin sədri Rüfət Mahmud isə “Bir” ekosistemi ilə baş tutan bu əməkdaşlığın xalqımızın tarixi irsinə mühüm töhfə olduğunu qeyd edib: "İçərişəhər hazırda tarixi irsin qorunmasını, rəqəmsal idarəetməni və davamlı şəhər idarəçiliyini innovativ texnologiyalar və məlumatlara əsaslanan həllərlə birləşdirən "Ağıllı Qoruq" (Smart Reserve) modelinə doğru irəliləyir. Tarixi irsimizin qabaqcıl texnologiyalarla vəhdəti həm sakinlər, həm yerli sahibkarlar, həm də hər il Bakıya səfər edən milyonlarla turist üçün qüsursuz və yaddaqalan təcrübə formalaşdıracaq. Biz “Bir” ekosistemi ilə bu mühüm təşəbbüsdə tərəfdaşlıq etməkdən məmnunuq və həm əlçatanlığı artıran, həm də unikal mədəni irsimizin qorunmasına xidmət edən ağıllı texnologiyaların tətbiqini səbirsizliklə gözləyirik".
Bu Anlaşma Memorandumu hazırda 5 milyondan çox insana xidmət göstərən “Bir” ekosisteminin əhatə dairəsini daha da genişləndirəcək. Layihə çərçivəsində İçərişəhərin rəqəmsal bankçılıq və ödəniş infrastrukturunun gücləndirilməsi, muzey və tədbir biletlərinin satışının rəqəmsallaşdırılması, həmçinin Vahid Ziyarətçi Mərkəzinin və loyallıq proqramının istifadəyə verilməsi nəzərdə tutulur. Bütün bunlar İçərişəhəri ziyarət edənlərə qüsursuz rəqəmsal təcrübənin təqdim olunmasına xidmət edəcək.
Qeyd edək ki, hazırda Bakı BMT-nin 13-cü Ümumdünya Şəhərsalma Forumuna (WUF13) ev sahibliyi edir. Sürətli urbanizasiyanın cəmiyyətə, şəhərlərə, iqtisadiyyata və iqlim dəyişikliyinə təsirlərini öyrənmək məqsədi ilə hələ 2001-ci ildə BMT tərəfindən təsis edilən bu mötəbər qlobal tədbir Qafqaz regionunda ilk dəfədir keçirilir. İçərişəhərin rəqəmsallaşdırılması layihəsi də məhz WUF13 çərçivəsində geniş ictimaiyyətə təqdim olunub.
“Bir” Azərbaycanda fərdi və korporativ müştərilərin gündəlik xidmətlərdən istifadə davranışlarını kökündən dəyişən, Qafqazın ilk tam inteqrasiya olunmuş rəqəmsal ekosistemidir. Ölkənin aparıcı brendlərini – “Birbank” rəqəmsal mobil bankçılıq tətbiqi, “Birmarket” e-ticarət platforması, “Milliön” ödəniş terminalları və “m10” rəqəmsal pul kisəsini özündə birləşdirərək 2025-ci ildə fəaliyyətə başlayan ekosistem hazırda 5 milyondan çox müştəriyə xidmət göstərir. Geniş infrastruktur imkanları, eləcə də “Trendyol Azərbaycan” və “BakıKart”la qurulmuş strateji tərəfdaşlıqlar sayəsində “Bir”, Azərbaycanın ilk və ən irimiqyaslı rəqəmsal ekosisteminin əsasını qoyur.
Ətraflı məlumat üçün: https://bir.az/
Bölmənin digər xəbərləri
