"The Seoul Times" qəzeti Azərbaycan əhalisinin sayının 10 milyona çatmasından yazır
Bakı, 18 aprel, AZƏRTAC
Cənubi Koreyada ingilis dilində nəşr olunan "The Seoul Times" qəzeti Azərbaycan əhalisinin sayının 10 milyona çatması barədə geniş məqalə təqdim edib.
AZƏRTAC xəbər verir ki, məqalədə Azərbaycanın 10 milyonuncu sakininin aprelin 6-da hazırda Ermənistanın işğalı altında olan Dağlıq Qarabağ bölgəsindən olan məcburi köçkün ailəsində dünyaya gəldiyi qeyd edilib. Bildirilib ki, Prezident İlham Əliyev və birinci xanım Mehriban Əliyeva bu münasibətlə Azərbaycan xalqını təbrik edib.
"The Seoul Times" qəzeti Azərbaycanda əhalinin sayının çoxalmasını ölkədə davamlı sosial-iqtisadi inkişaf və əhalinin rifahının yaxşılaşması ilə əlaqələndirib. Ölkədə həyata keçirilən hərtərəfli islahatlar əhalinin güzəranının yaxşılaşmasına müsbət təsir göstərib. Son 15 ildə ölkədə görülmüş işlər nəticəsində işsizlik və yoxsulluq səviyyəsi xeyli aşağı salınıb, iqtisadiyyat 3 dəfə artıb.
Qeyd olunub ki, Azərbaycanda həyata keçirilən islahatlar beynəlxalq maliyyə təşkilatları, o cümlədən Dünya Bankı, Avropa Yenidənqurma və İnkişaf Bankı tərəfindən yüksək qiymətləndirilib. Dünya İqtisadi Forumunun hesablamalarına əsasən Azərbaycan iqtisadi rəqabətliliyə görə dünyada 35-ci yerdədir.
Bölmənin digər xəbərləri
